Suenter l’accident mortal tar las pendicularas a Laax ha la procura publica instradà ina procedura penala per mazzament per negligientscha. Duas persunas da las pendicularas sajan accusadas, uschia la procura publica envers RTR. Tgi che quellas duas persunas èn, n'ha la procura publica betg vulì dir.
Crudà 40 meters
Il glindesdi è in emprendist da 17 onns mort durant lavurs da mantegniment. Il giuven saja stà vi da lavurs da mantegniment cun in collavuratur sin la pitga 2, conferma l'Arena Alva – l'emploiader dal giuven. Il rodam da la cabina l'haja stratg giu da la plattafurma ed el saja crudà 40 meters. Il servetsch da salvament haja be pli pudì constatar sia mort, scriva la Polizia chantunala.
Ins saja immens trist da la mort da ses emprendist, communitgescha il post da medias da la gruppa Arena Alva. Els expriman lur profundas condolaziuns als confamigliars dal giuven. Ultra da quai sincerescha l'interpresa da pendicularas da cooperar cumplettamain cun las autoritads e sustegnair tut las investigaziuns.
L'andament da l'accident vegn investigà
Sch'il giuven saja stà segirà cun ina suga saja part da las investigaziuns, ha il servetsch da medias da la Polizia chantunala ditg sin dumonda. Cler saja ch'el saja stà sin ina plattafurma cun ina spunda avant l'accident. Cun agid dal Servetsch svizzer d'inquisiziun da segirezza (SUST) investigheschan la Polizia chantunala e la Procura publica grischuna l'accident.
Ulteriura procedura pendenta da l'incap dal schaner
Plinavant è era anc ina segunda procedura pendenta pervia da «Allontanar u betg installar indrizs da segirezza» cunter quatter persunas. Quai ha la procura publica confermà sin dumonda da RTR.
Lezza pertutga l'incap dal schaner cura ch'ins aveva mess vidlonder memia blera rauba vid ina gondla da la medema pendiculara. Perquai che la gondla era uschia memia greva ha quella tutgà il plaun e chaschunà che plirs passagiers a bord èn crudads. Ina passagiera è vegnida blessada lev vid in det.
