Vi da la cabina da la pendiculara Laax – Crap Sogn Gion n’avess nagina rauba dastgà vegnir pendida vidlonder. A questa conclusiun vegnan las pendicularas da Laax. Tar la cabina pertutgada era in sistem ch’avess stuì admonir da la surchargia deactivà. Quai pervi dad in defect sco Martina Calonder, la pledadra da l’Arena Alva, ha ditg sin dumonda da l’agentura da novitads Keystone/SDA. Ils 5 da schaner aveva la rauba pendida vi da la cabina l’emprim tutgà plantas e suenter il terren. Da las 35 persunas ch'eran en la cabina è ina sa blessada levamain.
Sco l'interpresa communitgescha vinavant, haja dà dus ulteriurs sbagls. Per l'ina haja in maschinist calculà incorrect il pais da la crappa pendida vid la cabina, e per l'autra haja il manischunz da la cabina franà quella per cura ch'ella ha tutgà il terren e betg gia suenter las plantas.
Ins na fetschia uss nagins transports da rauba pli durant che persunas vegnan transportadas.
