En il rom dals 59avels dis da film a Soloturn vegn surdà il Prix Swissperform. En la categoria «meglier actur principal / meglra actura principala» ha gudagnà Dominique Devenport, per sia rolla sco tgirunza en la seria «Davos 1917». Per la schuria saja immediat stà cler che Devenport survegnia il premi, uschia vegn cità Samuel Streiff en ina communicaziun a las medias.
Che la seria funcziunescha uschè bain per tantas persunas, è per gronda part d'attribuir a la prestaziun da l'actura principala.
Arcadi Radeff meglier actur senza rolla principala
La prestaziun en las producziuns «Délits mineurs» e «Les Indociles» han persvas la schuria da dar il premi per la rolla betg principala a Arcadi Radeff. Omaduas producziuns èn dad RTS.
Il premi per la generaziun giuvna ha survegnì Stéphane Erös, era per la producziun «Délits mineurs». Carol Schuler è vegnida undrada cun il premi da la schuria. Schuler è dapi il 2020 cumissaria en il «Tatort» a Turitg.
Ils premis èn dotads cun mintgamai 10'000 francs, e vegnan surdads dapi il 2001 ad acturs ed acturas en producziuns da televisiun. Part da la schuria da quest onn han fatg Samuel Streiff (actur), Aline Schmid (producenta da film) ed il manader artistic dals dis da film, Niccolò Castelli.