Durant ils Dis da litteratura a Soloturn vegn Asa Hendry onurada a Soloturn cun il Premi svizzer da litteratura 2026 per ses text dramatic «archiv», in monolog che tracta da traumas che vegnan dads vinavant da generaziun a generaziun en ina famiglia da purs. Il premi è dotà cun 25'000 francs.
Sco che la persuna scriventa ha ditg envers RTR, saja in bel sentiment sche la lavur vegn appreziada e survegn ina tala reconuschientscha.
Plaschair ed dischillusiuns
Ils Dis da litteratura a Soloturn èn ina gronda plattafurma per la scena litterara da la Svizra. Er Gianna Olinda Cadonau preschenta sia publicaziun «Am Kantenhain» cun raquints tudestgs. Ed uschia è la preschientscha rumantsch-grischuna da quest onn era gia enumerada. Per l'autura da l'Engiadina èsi in grond plaschair da pudair far part – gist er perquai ch'ella è represchentada cun sias istorgias curtas e betg cun in roman. Normalmain saja pli simpel da vender in roman che istorgias curtas - tant ad in public, sco er ad uschè in festival.
Era sch’i dess anc autras publicaziuns grischunas d’interess, uschia per exempel il pli nov roman dad Angelika Overath «Calanda oder Alvas Antwort». L'autura ch'abita a Sent n'è dentant betg vegnida envidada en als dis.
Jau sun dischillusa che jau na sun betg vegnida envidada en quest onn. Jau viv per il scriver e dal scriver.
Spezialmain trumpada saja ella, perquai ch'ella considerescha ses cudesch actual sco ina da sias ovras las pli impurtantas.
Linguas minoritadas: vesair e vegnir vesì
Nadina Derungs, la manadra da la Chasa Editura Rumantscha ch'ha edì il cudesch premià «archiv» dad Asa Hendry, sa giavischass adina dapli visibilitad – almain ord vista rumantscha. En cumparegliaziun cun la massa da litteratura da lingua tudestga, taliana e franzosa saja la litteratura rumantscha gia represchentada adequatamain.
Sco moderatur, dentant er sco translatur è Claudio Spescha als dis da litteratura. Uschè occurrenzas dattan la pussaivladad d'avrir il horizont e da preschentar ils texts d'ina lingua minoritara ad in public pli vast. Plinavant saja interessant da vesair las reacziuns.