Per la retschertga represchentativa èn 5'060 persunas da la Svizra, da la Germania, da l'Austria, da l'Italia e da la Frantscha vegnidas interrogadas davart lur disas da leger. Ils pli blers lecturs datti proporziunal en Svizra – Mintga segunda persuna legia almain quatter cudeschs per onn. Mintga quarta persuna schizunt 10 u dapli.
La popularitad dal leger sa mussa er en la biblioteca da la citad da Cuira
Circa 550 visitadras e visitaders dumbra la biblioteca da la citad mintga di. Cumpareglià cun ils ultims tschintg onns saja quest dumber creschì. La biblioteca da la citad porscha surtut «litteratura leva», vul dir cunzunt romans, crimis e cudeschs d'uffants enstagl da cudeschs spezialisads. En tut sajan da chattar sin ils dus plauns da l'anteriur edifizi da posta 32'000 cudeschs. Surtut cudeschs d'uffants e crimis sajan bainvesids tar la clientella, ils classichers ed ils cudeschs da paraulas na vegnan tenor Annalea Reich, responsabla per ils meds da la biblioteca, dentant betg emprestads uschè savens.
Lectura per persunas rumantschas
Era per ina purschida en rumantsch èsi procurà, circa 100 cudeschs per uffants e creschids èn da chattar en la biblioteca. Gist ils cudeschs per uffants sajan fitg appreziads, ina dumonda plitost pitschna regia dentant tar ils cudeschs rumantschs per giuvenils e creschids. Quai haja tenor Annalea Reich da far surtut cun il fatg che quests cudeschs vegnian plitost cumprads che emprestads da la glieud.
Il plaz è plitost stgars
Per emna survegn la biblioteca fin 100 cudeschs novs. Per stgaffir plazza, vegnan zavrads mintg'onn tranter 8'000 e 9'000 cudeschs. Emprim vegnan els mess en vendita en il martgà da plugls da la biblioteca, sch'els na chattan là nagin nov possessur, vegnan els dismess.
I dettia dentant tuttina be durant ils mais d'enviern avunda spazi en ils regals, perquai lura sajan emprestads bundant la mesadad da tut ils cudeschs. Pia èn durant quest temp bundant 16'000 cudeschs en gir. Durant la stad vegnia percunter legì marcantamain pli pauc, uschia dettia lura mintgatant problems da plaz, perquai che la gronda part dals cudeschs saja en la biblioteca e spetga là sin novas lecturas e novs lecturs.
Lura stuain nus oramai improvisar, ed avain era gia mantunà ils cudeschs tar ina tur sper ils regals.
Ultra da cudeschs pon ins emprestar en la biblioteca era films, cudeschs auditivs, termagls e gieus da cumpagnia. Era senza avair in abunament stattan a disposiziun a tut las visitadras ed a tut ils visitaders tut ils meds al lieu sco era laptops cun access a l'internet.
Nus essan in lieu, nua ch'ins po simplamain vegnir sperasvi e restar, e quai senza stuair consumar insatge. Jau crai che quai è insatge unic en la citad.
Or da l'archiv
Per noss format da gieus «Battas RTR?!» è la biblioteca da Cuira schizunt daventada lieu per challanges divertentas. Las schumellinas engiadinaisas Arina e Viviana emprovan da batter il team RTR – Elias Tsoutsaios e Marcus Petendi – en diversas disziplinas per in premi d'enfin 400 francs. Perfetga culissa per Arina, ch'ha gia lavurà en ina biblioteca.