Gia l'onn passà avev'ins fatg in project da pilot. Ensemen cun duas scolas da Cuira ins ha realisà ina collavuraziun e badà che l'interess era grond. Cunzunt uffants che n'han betg tudestg sco lingua materna han mussà l'interess da pudair ir a leger e discurrer tudestg. Passa 80% dals participants dal project da pilot avevan in'autra lingua materna. Ils tandems da lectura èn però per tut ils uffants da las segundas e terzas classas primaras da Cuira, independent dal livel da leger ni da lur lingua materna.
Per l'onn nov da scola - nua ch'il project è avert per tut ils scolars da las segundas e terzas classas da Cuira - s'han annunzià gia passa 15 scolars e scolaras per savair ir a leger regularmain en la biblioteca da Cuira. Per bler dapli na fiss betg plaz en la biblioteca, cun quai ch'ins dovra plazzas per leger, discurrer e giugar. Sper la promoziun da la lingua è era la relaziun tranter la persuna voluntaria e l'uffant ina gronda prioritad. Per quai vegn sper il leger era giugà. Leger 45 minutas il toc fiss era memia bler per uffants da quella vegliadetgna.
Per esser voluntari ins na dovra betg ina scolaziun speziala: avant che l'onn da scola cumenza datti da la biblioteca ina curta scolaziun. Era sche la lavur è voluntaria datti in grazia fitg da la biblioteca, quai en furma d'in abunament da l'onn.
In tandem rumantsch in di?
Quest onn è la purschida be per tudestg. Tenor la maina project Christa Schmid, fissi pussaivel da far era in autras linguas. Per che autras linguas vegnan ad esser part dal project, ha la dumonda però anc da crescher. Sch'ins badia che geniturs avessan gugent ch'ils uffants legian dapli en autras linguas, fiss quai in mintga cas pussaivel per in auter onn.
