Cun la victoria da Nemo a l'Eurovision Song Contest 2024 a Malmö en Svezia èsi stà cler che la pli gronda concurrenza da musica ch'i dat vegn en Svizra. La cursa sco lieu d'occurrenza ha la finala Basilea fatg. Ils 11 da matg vegn l'ESC lantschà cun ina ceremonia d'avertura. La decisiun cun il grond victur u la gronda victura dal contest croda la sonda, ils 17 da matg. Sper la concurrenza da musica datti en la citad da Basilea in program accumpagnant cun concerts ed events en ina zona da festa.
Era RTR è avant lieu e rapportescha da Basilea. Per sa preparar sin las emissiuns a Basilea datti mintgamai avant ils mezfinals in’emissiun dad in’ura ed avant il final in’emissiun da duas uras. Durant il final da la sonda saira datti in’emissiun speziala en quatter linguas live da Basilea tranter auter cun noss moderatur Elias Tsoutsaios.
En il ticker vegnis vus regularmain infurmà davart quai che curra e passa en ed enturn l’ESC a Basilea.
Zoë Më chanta per la Svizra
La musicista da 24 onns Zoë Më vegn a represchentar la Svizra cun la chanzun «Voyage». Cun questa ballada franzosa vul ella envidar la glieud sin in «viadi per dapli umanitad», ha ella ditg envers SRF. Zoë Më è stada tant «SRF 3 Best Talent» sco er «RTS Artiste Radar».
En l'emprim mezfinal, ils 13 da matg, chanta Zoë Më per l'emprima giada sia chanzun. Ella na vegn dentant betg valitada cunquai che la Svizra è gia qualifitgada directamain per il final grazia a la victoria da l'onn passà da Nemo.
La Svizra ha gia gudagnà trais giadas l'ESC. L'ultima giada il 2024 tras Nemo, il 1988 cun Céline Dion e 1956 ha Lys Assia persvadì ed è stada la gronda victura da l'emprim contest insumma. Il 1989 ha enfin uss la suletta gruppa rumantscha preschentà la Svizra a l'Eurovision Song Contest, numnadamain ils Furbaz cun la chanzun «Viver senza tei». Da lezzas uras era il contest stà a Losanna, in onn suenter che Céline Dion aveva gudagnà per la Svizra.
Hunziker, Brugger e Studer modereschan
Las trais moderaturas Michelle Hunziker, Hazel Brugger e Sandra Studer vegnan a manar tras il final da l'Eurovision Song Contest en la halla St. Jakob. Ils dus mezfinals modereschan Hazel Brugger e Sandra Studer. Sandra Studer è sezza gia stada sin il palc da l'ESC, quai cun represchentar il 1991 la Svizra. Sper la show en la halla cun 36'000 aspectaturas ed aspectaturs èn en la citad da Basilea er organisads public viewings dal final.
Tge pajais concurrenzeschan en ils mezfinals?
Ils 28 da schaner ha Malmö surdà il ESC simbolicamain a Basilea. Plinavant è vegnì tratg la sort per ils mezfinals tgi che concurrenzescha in cun l'auter. La Svizra è sco pajais ospitant automaticamain en il final, sco er la Germania, la Frantscha, l'Italia, la Spagna e la Gronda Britannia che tutgan tar ils «Big Five». La show è vegnida producida da studentas e student da la FHGR.
Ils pajais che concurrenzeschan al mezfinal ils 13 da matg 2025 a Basilea:
| 1. mesadad da la show | 2. mesadad da la show |
|---|---|
| Slovenia | Albania |
| Ucraina | Aserbaidschan |
| Pologna | Croazia |
| Svezia | Pajais Bass |
| Portugal | Norvegia |
| Islanda | San Marino |
| Cipra |
Ils pajais che concurrenzeschan al mezfinal ils 15 da matg 2025 a Basilea:
| 1. mesadad da la show | 2. mesadad da la show |
|---|---|
| Lituania | Tschechia |
| Armenia | Israel |
| Montenegro | Malta |
| Grezia | Finlanda |
| Irlanda | Danemarc |
| Australia | Luxemburg |
| Lettonia | Georgia |
| Austria | Serbia |
Da las 31 artistas ed artists dals mezfinals fan mintgamai 10 il pass en il final. Auter che en il final nua che ina giuria po reparter la mesadad dals puncts decidan en ils mezfinals be aspectaturas ed aspectaturs via televoting tge act che sa qualifitgescha. Durant l’istorgia è quai sistem sa midà pliras giadas.
Ina lunga istorgia che ha cumenzà en Svizra
Dapi il 1956 ha l’Eurovision Song Contest gì lieu 68 giadas. L’emprima ediziun è stada a Lugano. L’idea e l’organisaziun è vegnida da la Svizra ed è stada inspirada da la concurrenza musicala da l’Italia «Sanremo Festival». Sa mess atras tranter ils emprims set participants (Pajais Bass, Germania, Svizra, Belgia, Luxemburg, Frantscha e Italia) è la candidata svizra Ly Assia. La proxima victura svizra hai pir dà var 30 onns pli tard cun la chantadura Céline Dion. Be cun in punct avantatg ha ella cuntanschì l’emprim plaz. Fa part per la Svizra ha ella be perquai che melodia sco era text da sia chanzun «Ne partez pas sans moi» era vegnì scrit da svizzers. Ord quai motiv ha l’ESC fatg il proxim stop en Svizra il 1989. Là cun l’emprima e suletta furmaziun rumantscha: ils Furbaz.
Ils ultims onns ha la Svizra lura adina puspè gì success ed è regularmain sa qualifitgada per il final (2023 Remo Forrer #20, 2022 Marius Bear #17, 2021 Gjon’s Tears #3, 2019 Luca Hänni #4) Fin che Nemo ha il 2024 pudì ir per la victoria.