Mes tattoo, mia istorgia – Amalia Grond
Amalia Grond ha laschà tetovar il pled «Jaura» sin ses bratsch sanester – sco segn da colliaziun cun la Val Müstair, quai malgrà ch'ella n'ha mai vivì là e n'è betg creschida si rumantsch. Ses bab deriva dentant da la Val Müstair ed entras el ha la giuvna emprendì l'idiom respectiv il dialect «Jauer». Sias ragischs da la Val Müstair n'ha ella betg vulì perder uschia ch'ella ha bajegià si ina gronda motivaziun d'emprender rumantsch cun circa 10 onns.
Oz discurra Amalia rumantsch fluentamain – e viva sapientivamain quella identitad sco «Jaura».
Mes tattoo, mia istorgia – Renzo Hendry
L'anteriur rapper Renzo Hendry da las Liricas Analas è daventà in viticultur. Il vin «Pinot Noir», ch'el cultivescha plascha ad el uschè fitg, ch'el è sa decidì da tetovar il num da quest vin respectiv l'iva sin ses bratsch. En il discurs raquinta el davart sia emprima scuntrada cun il «Pinot Noir» e che quest vin è stà l'emprima sbrinzla ch'ha manà el tar sia professiun da siemi sco viticultur – pia amur sin l'emprima egliada respectivamain «schluc».
Mes tattoo, mia istorgia – Tonja Pelican
Sin la chomma da Tonja Pelican sautan dus animals en amur eterna: in salip ed ina furmicla: Il tattoo sa referescha a la chanzun rumantscha dad uffants «Salep e la furmicla» ch'è enconuschenta a blers uffants rumantschs da pitschen ensi e che gioga ina rolla gronda en la cultura rumantscha.
L'idea ha ella gì durant in viadi en il Mexico. Là ha ella laschà eternisar il motiv – in mument ch'ella descriva sco magic fin oz.
Mes tattoo, mia istorgia – Gion Mathias Cavelty
Gion Mathias Cavelty n'ha quasi nagin plaz liber pli sin sia pel. L'autur rumantsch ha vulì daventar sez in «cudesch». Blers dals tattoos han ina colliaziun cun la religiun ubain era caracters litterars.
La «armadira» da tattoos ha per el ina gronda muntada persunala – ed el collia quai cun ina buna purziun sarcassem ed ironia.
Mes tattoo, mia istorgia – Chiara Degonda
Chiara Degonda ha eternisà ina bella memoria sut la pel sco mussament da charezza envers sia tatta. Numnadamain ha ella tetovà quella construcziun sin ses bratsch: «Per adina, tia tatta Dora». E quella frasa n'ha betg Chiara Degonda scrit, mabain sia tatta da 94 onns ch'ha demenza.
Chiara Degonda lavura en la tgira e sa co las consequenzas da questa malsogna sa mussan. Tut tenor quant avanzà che la demenza è, perdan ins era la savida co scriver. Quai ha Chiara Degonda realisà ed ha laschà scriver a maun la tatta ina bella construcziun per savair eternisar quai per adina sin sia pel. Cura che Chiara Degonda guarda sin il tattoo – lura dat quai forza ad ella per surmuntar situaziuns difficilas.