Ina part marcanta en il program èn inscunters e barats lirics. Tschintg auturs ed auturas rumantschas e tschintg poets e poetessas da differentas linguas neolatinas vegnan a leger e discutar ensemen.
- Il poet giuven catalan Pol Guasch inscuntra la sonda la poetessa rumantscha Jessica Zuan sin in palc da Nairs.
- Il poet portugais Carlos Coelho che viva a Scuol sa baratta cun la liricra Gianna Olinda Cadonau da Scuol.
- La poetessa galiziana (d'ina regiun dal nord da la Spagna cun in'atgna lingua) Yolanda Castaño discuta e legia cun l'autura engiadinaisa Leta Semadeni.
- E la poetessa ladina da las Dolomitas Nadia Rungger vegn ad esser sin il palc da Nairs cun l'autur vallader Dumenic Andry.
Suenter il palc interneolatin – ina perfomance multimediala sin basa da questas poesias – la sonda saira cun Astrid Alexandre, Annina Sedlacek, Selina Beghetto e Myriam Gurini suonda dumengia la bun'ura l'ultim inscunter tranter l'autura tessinaisa Prisca Agustoni e l'autura engiadinaisa Romana Ganzoni.
Tar quests inscunters lirics datti sper ina discussiun tranter ils dus interculturals er ina prelecziun cuminaivla. Tschintg poesias da mintga poet e poetessa èn numnadamain vegnidas translatadas en rumantsch.
La lirica en il center dal festival
Ina particularitad dal rumantsch ed er dad autras linguas minoritaras è ch'ina gronda part dals cudeschs publitgads èn collecziuns da poesias. Er perquai han las duas curaturas dal festival Flurina Badel e Bettina Vital mess il focus sin la lirica neolatina.
Pli stgars ch'il vocabulari vegn e dapli pais ch'ils singuls pleds survegnan.
Rico Valär, professur per litteratura e cultura rumantscha a l'Universitad da Turitg moderescha dumengia ina discussiun davart il scriver lirica en linguas neolatinas, la relaziun dal rumantsch cun quellas e la politica da lingua cun differents poets e poetessas.
Er translatar lirica – in tema contestà – vegn discutà al festival a Nairs. La dumengia suentermezdi vegnan ils translaturs e las translaturas da las poesias a discutar davart translatar lirica neolatina tar il discurs al podium moderà da Ruth Gantert.
Il festival cumenza sonda ils 18 da mars e dura fin la dumengia saira.
