«The Artist's Way» a Riom
A Riom en il chastè vegn preschentà questa fin d'emna «The Artist's Way» da Robert Robinson. Il coreograf reflectescha la recepziun da temp ed instabilitad sin sia atgna via artistica. I saja fitg spezial da producir en quests mirs. Il chastè haja ina impurtanta istorgia ed i saja grondius da cumbinar ils dus temas «natira» e «temp». L'entir festival da stad dad Origen stat sut l'ensaina dal «temp».
Quest toc è en ina moda e maniera autobiografic.
«Aeon» sin il Güglia
Il coreograf e sautunz Luca-Andrea Tessarini explorescha cun persunalitads da saut dal Nederlands Dans Theater la forza da la natira en il curs dal temp. El haja duvrà tut sia forza persvasiva per dastgar mussar ses toc en la tur d'Origen sin il Pass dal Güglia, di il sautunz da Basilea. Per el è la tur in lieu d'inspiraziun. El haja sentì uschè blera energia creativa dal lieu e veglia uss prender cumià dal bajetg. Per el n'èsi betg chapibel che la tur na dastga betg restar qua.
L'ultima stad per la tur cotschna
Il temp per la tur sin il Pass dal Güglia scula la fin d'avust. Quest lieu haja provocà blera creativitad, di Giovanni Netzer, l'intendant dad Origen. Igl ha dà bleras producziuns novas sin il pass, ils artists ed artistas hajan fitg gugent il lieu. Il cumià rendia trist. Ins senta las emoziuns da l'um ch'ha inizià il project. La tur vegnia a mancar ad el. I na saja betg in lieu surlavurà mabain in lieu plain vita che dettia er la pussaivladad da sa sviluppar. Il pli gugent laschass er el star la tur.
Da stuair destruir insatgè ch'è plain vita fa mal.
Ina nova dumonda per pudair prolungar la vita da la tur na vegni dentant betg a dar. La tur vegn bainbaud spazzada.
Or da l'archiv:
