Che las finanzas limiteschan fermamain, mussa gia il fatg ch'i n'è per il teater betg stà pussaivel d'augmentar las pajas dal persunal per gulivar la chareschia. Gia 150'000 francs ad onn dapli, gidassan tenor Johannes Flury. Er qua sa mussa ch'il teater fa pitschens pass.
Ir ora en las regiuns e tar l'economia
Ina pussaivladad per generar dapli entradas vesa il president dal cussegl da fundaziun p. ex. enten porscher a firmas d'envidar il teater da Cuira per ina producziun a la saira da fatschenta. Perquai saja er impurtant da crear lioms sur Cuira or. En questa direcziun – sper las entradas finanzialas – va er l'idea da porscher il know-how a gruppas da teater regiunalas e localas. Uschia pudess il teater da Cuira p. ex. metter a disposiziun il tecnicist ubain surpigliar la reschia u la communicaziun.
In pau in vi e nà tranter citad e chantun
Ina vart èn las chaussas ch'il teater iniziescha sez. L'autra è la dumonda politica tgi che duai sustegnair e s'engaschar quant ferm per il pli grond teater dal chantun. Actualmain vegnia il teater bain sustegnì tant dal chantun sco era da la citad, il bal giaja però savens er in pau vi e nà cunquai ch'il chantun saja da l'avis ch'igl è en emprima lingia chaussa da la citad e la citad pretenda dapli engaschi dal chantun. E lura dettia er anc la dumonda da l'aglomeraziun: La glieud dal conturn da Cuira vegnia er a teater ma la tenuta saja er qua anc plitost ch'i saja il teater da Cuira ed uschia chaussa da la citad.
Quai ch'il teater da Cuira ha forsa da basegn è propi ina strategia nà da la citad e dal chantun che di quest e quest e quest lain nus cun il teater.
Per schliar questa tematica è Johannes Flury da l'avis ch'i dovria ina strategia, principalmain tranter chantun, citad e teater, tge ch'ins veglia cun quest teater.
Proxima sfida – renovaziun dal bajetg
La proxima sfida, er finanziala, spetga gia. Il bajetg dal teater sto vegnir renovà ils proxims onns. Qua è Johannes Flury da l'avis ch'i saja ozendi pli simpel da survegnir daners per ina renovaziun che per la lavur dal mintgadi. Ma per els saja essenzial da pudair recaltgar dapli daners gist per questa lavur. Las producziuns na vegnian numnadamain er en in nov bajetg betg pli bunmartgadas.
