Il cussegl da fundaziun dal teater Cuira ha elegì Maike Lex sco successura da Roman Weishaupt. Ella entra en funcziun per las stagiun 2024/2025. Sco ch'il president dal cussegl da funcziun, Johannes Flury ha ditg, hajan ins pudì tscherner Maike Lex or da totalmain 14 annunzias e tschintg che sajan vegnidas en la runda finala per ils post da directur u directura. Persvas haja ella cun sia persunalitad, cun quai ch'ella haja preschentà sco pussibilitad per realisar a Cuira e la finala er perquai ch'ella haja manà suletta cun success il teater pitschen a Berna cun tut quai che tutga tiers fin tar l'organisaziu, persunal e finanzas. Quai che saja lura er ses pensum a Cuira, uschia Johannes Flury vinavant.
Betg revoluziunar l'existent
Ina da las finamiras principalas da la dunna da 48 onns è da cuntinuar ed approfundar la collavuraziun. Saja quai cun ils auters teaters a Cuira u er cun atcturas ed acturs da l'entir chantun. Sia finamira suenter intgins onns da lavur:
En il cas ideal hai jau emprendì d'enconuscher glieud dal teater da tut ils chantuns e valladas dal Grischun e nus avain creà ina plattafurma nua che nus cooperain ed avain chattà novas pussaivladads da collavurar.
Quai che pertutga experiments na veglia ella betg surfar cun producziuns che sclaudian tut tenor in grond public. Mabain plitost far teater per tuttas e tuts. Bain dar sapzi er per experiments ma pir cumenzar cun quels cura che la relaziun cun il public saja francada.
Sco ina pussaivla furma realisass Maike Lex gugent «minifestivals» nua ch'i dettia tar in tema ina producziun gronda ed enconuschenta enramada da pliras pitschnas producziuns, realisadas p. ex. en il rom da la promoziun da talents.
Ch'ella n'ha fin uss ni gì ber contact cun il Grischun ni cun il rumantsch e talian na vesa ella betg sco handicap, mabain plitost sco schanza. Il tema da la plurilinguitad e d'integrar e far chapir differentas linguas sin tribuna saja ad ella bain enconuschent da sia lavur fin uss. Uschia sa legra ella lura er sin il stgazi cultural e da lavurar en e cun la trilinguitad grischuna.
Che sia lavur capita en in ambient pretensius – principalmain ord vista finanziala – da quai è ella pertscherta. Ma ella è tuttina persvasa ch'i gartegia da metter en pe bunas ed er novas producziuns. Per ina perquai ch'ella haja experientscha en rimnar daners e per l'autra perquai che la chasa a Cuira vivia, la glieud lavuria gugent là ed in bun public haja il teater da Cuira er. Quai sajan gia bunas premissas.
Fin ussa directura a Berna
Lex, ch'è naschida il 1974 a Ludwigshafen al Rain ed ha studegià scienzas culturalas e pratica estetica a Hildesheim. Ella ha lavurà sco reschissura e dapi il 2014 è ella stada co-manadra e suenter directura dal teater pitschen «Schlachthaus Theater» a Berna.
