L'astella vegn dal lain, pudessan ins pretender. Quai tutga bain la noda, dentant sulet cun ina buna purziun talent n'èsi betg anc fatg. Tuttina n'èsi nagina surpraisa che gist tschintg da las figlias e cusrinas ord la famiglia Scherrer da Trun han il giavisch da far ina via musicala.
La pli veglia dad ellas è Maria Bognar, la figlia da Letizia Scherrer e Ferenc Bognàr. Er ils geniturs da Maria èn omadus musicists da professiun. Maria vul era far questa via professiunala, il settember ha ella cumenzà il studi da musica a Vienna.
Suenter avair fatg musica sa sentan ins simplamain bain, sco sch'ins avess gudagnà insatge.
Maria Bognar è creschida si a Feldkirch en Austria, visita dentant savens la tatta a Trun. En la chasa paterna da la famiglia Scherrer vivan era Clau Scherrer e Rilana Cadruvi Scherrer cun lur trais figlias ed in figl. Gia dapi decennis vegn fatg musica en questa chasa. «Insatgi è adina vid chantar ubain far musica en nossa chasa, quai è normal», di Clara Maria Scherrer. Era la mamma Rilana è musicista da professiun e dirigia cun gronda passiun differents chors.
Uschia èsi cler che la musica è omnipreschenta. Clara Maria e sias duas soras Eva Luisa e Maria Catrina vivan la musica da pitschnas ensi. Savens en furmaziuns nua il bab Clau ubain la mamma Rilana èn involvads. Era ellas trais prevesan da far in studi da musica, nua n'è betg anc dal tut cler, anc han ellas temps enfin ch'il gimnasi è terminà. Actualmain èn tuttas trais mattas en il gimnasi da la claustra da Mustér. Marc Aurel, il pitschen dals Scherrers, fa era musica. El è dentant plitost quel che ha gugent pop e rock e dat cun plaschair sin la battaria.
Schon cun il tat Carli e la tatta Sabina ha la musica emplenì la chasa. Enconuschentas eran las soras Scherrer vegnidas en ils onns 90. Il frar Clau accumpagnava ellas al clavazin ed uschia èn ellas sa preschentadas savens. Trais dals tschintg uffants – Judit, Clau e Letizia – han lura decidì d'ir la via professiunala cun la musica. Quai fan tuts cun grond success e renconuschientscha. Era Giulietta Barenius è ina da las tschintg cusrinas che vegn a far ina sumeglianta via professiunala. Actualmain chanta ella savens ensemen cun las cusrinas a Trun, studegia dentant a Feldkirch. Suenter finir là il gimnasi da musica less er ella studegiar musica classica.
Concert communabel
Per l'emprima giada insumma, hai dà la stad in project sur tut las generaziuns. In inscunter da famiglia nua che tuts e tuttas han fatg quai, ch'els ed ellas fan il pli gugent. Trais dis èn els ed ellas sa radunads en la chasa paterna a Trun ed han fatg ensemen musica per la finala realisar in pitschen concert. Cunzunt dapi la mort dal bab e tat Carli e da la sora Rosvita saja strusch stà pussaivel da far musica ensemen, di Letizia Scherrer.
L'idea da realisar quest project d'in pitschen concert sur las generaziuns è sco ina renaschientscha e quai ha per mai ina gronda muntada. Uschia va quai vinavant, quai munta fitg fitg bler a mai.
La famiglia Scherrer è enconuschenta per lur talents musicals e vala sco ina marca quai che pertutga qualitad da musica. Sa chapescha che era Rilana Cadruvi, la dunna da Clau Scherrer, ha influenzà la via musicala da lur uffants. Nagut auter tar il bab da Maria ed era il bab da Giulietta. Er els èn musicists da professiun ed han procurà che lur figlias èn creschidas si cun musica en las ureglias.
Che la generaziun giuvna vul era ir questa via saja dad ina vart bel, da l'autra vart saja era stà impurtant da far attent sin las varts main bellas da questa via. «Betg tut è aur» di Letizia Scherrer e Clau agiunta ch'ins sentia era magari ils cumbels en questa branscha. Era quai hajan els declarà.
Ina buna chaussa è che las tschintg cusrinas pon far musica cun nus ensemen. Quai porta bler cura ch'ellas van in di ora en il mund. Quai dat ina gronda segirtad ad ellas.
Il Cuntrasts dat invistas en la vita da la famiglia che sa maschaida cun la vita musicala. Giulietta Barenius: «Cura che jau chant cun mias cusrinas, èsi savens anc uschia: nus n'avain halt betg las pli grondas vuschs, perquai che nossas vuschs n'èn anc betg sa sviluppadas dal tut. Ed ussa, dad avair anc las ondas, che han propi las grondas vuschs – quai dat in uschè bel tun ensemen.»
La tradiziun musicala vegn transmessa cun gronda passiun, e las generaziuns pli giuvnas vegnan inspiradas per cuntinuar questa via. La musica è daventada ina part essenziala da lur mintgadi, che porta tant sfidas sco era plaschairs.
Sper il chant classic han las giuvnas Giulietta, Maria, Eva Luisa, Anna Catrina e Clara Maria anc auters interess. Quest onn han ellas era visità ensemen l'Open Air Lumnezia. Bella saja cunzunt la cumpagnia là ed era sche quella musica plaschia fitg bain, per il studi vegnia sulet il stil classic en dumonda. Qua èn tuttas tschintg cusrinas fitg perina.