Suenter lungas preparaziuns èsi sonda finalmain stà uschè lunsch: l'equipa dal teater Cuschnaus ha festivà premiera dal toc «Tgi sa tut, tgi sa dapli» e quai avant ina halla plaina, pia radund 160 aspectaturas ed aspectaturs èn sa rendids quella saira a Degen.
Premiera ha questa saira er Michela Projer da Vella gì che ha numnadamain per l'emprima giada fatg la reschia d'in toc da teater.
Quai s'ha dà uschia ed jau hai pensà d'empruvar ora ina giada insatge nov e da guardar co ch’i vegn.
La giuvna da 25 onns ha gia giugà en plirs tocs da teater e questas experientschas la han gidà da far la reschia. Michela Projer n'è dentant betg suletta: Ella ha survegnì era sustegn dals commembers e commembras da l'uniun. Insatge ch'ella appreziescha fitg.
La Lumneziana è cuntenta cun la prestaziun quella saira ed è era levgiada. Avant la premiera saja ella stada pli gnervusa, damai ch'ella saja quella giada gea betg mo stada actura, mabain era reschissura. Suenter che la premiera è gartegiada saja quella paisa ussa schon in zichel giu da dies.
Jau sun leda che nus avain dastgà cumenzar e sun simplamain cuntenta sco ch'igl è ì.
Sin visita ad ina emprova
Il toc gioga en in suler d'ina chasa da pliras famiglias e tematisescha problems e spectaculs ch'i po dar cun vischins e vischinas. En questa chasa vivan la vaiva Heidi Cabrin-Scalin che n'ha betg mo da sbatter cun sia figlia Clara che na vul betg tadlar ils cussegls da la mamma, mabain era cun il furnel vegl che brischa adina ils capuns ad ella. Il possessur da la chasa, Bernhard Tschèp, n'è dentant insumma betg pront d'investir in singul rap. La vischina Silvana Polo ch'è plain mirveglias gizza las ureglias tar tut ils discurs or en il suler e chaschuna massa tensiun cun sias interpretaziuns faussas. L'entira situaziun vegn anc pli delicata cun la preschientscha da la ex-miss Svizra Jouan della Val. Ella na porta betg mo bler «Glamour» en quella chasa, mabain era in mantun agitaziun.
-
Bild 1 von 5. La tribuna stat gia, il public manca anc. Bildquelle: RTR.
-
Bild 2 von 5. Durant ina curta pausa vegn discutà e barattà impressiuns. Bildquelle: RTR.
-
Bild 3 von 5. Ina scena dal segund act vegn trenada. Bildquelle: RTR.
-
Bild 4 von 5. Rita Montalta studegia il script dal toc davos la tribuna. Bildquelle: RTR.
-
Bild 5 von 5. La squadra da quest onn. Bildquelle: RTR.
La rolla da la ex-miss Svizra gioga Michela Projer. Uschia ha ella ina rolla dubla, pia reschissura ed actura. Quai ha la Lumneziana giavischà explicitamain, damai ch'ella stat fitg gugent sin tribuna.
Perquai ch'jau giog fitg gugent teater, hai jau ditg dapi l'entschatta: sche jau fatsch quai, lura fatsch jau omadus.
La gronda sfida da questa rolla dubla saja da vesair adina tut. Ella na po betg mo guardar sin sasezza, mabain sto era guardar sin ses cunacturs e sias cunacturas, di Michela Projer.
Ella ans dat la pussaivladad da lavurar sez vi da nossa rolla e da midar insatge. Igl è plitost ina lavur da team.
Las collegas sin tribuna sustegnan dentant la giuvna reschissura uschè bain sco ch’els pon ed èn cuntents cun la moda e maniera co che la Lumneziana fa reschia. I saja ina tenuta da lavur fitg integrativa e laschia era blera libertad da dar inputs.