L'istorgia ch'il scriptur svizzer John Knittel ha publitgà l'onn 1934 tracta d'ina famiglia che viva en in lieu fictiv a la via dal pass da la Viamala en il Grischun. La famiglia vegn tirannisada e manipulada dal bab da famiglia. L'unica via per la dunna e per ils uffants desperads è – da mazzar il bab. Il crim na vegn betg sclerì, e pir onns pli tard smanatscha il passà da vegnir a la glisch.
La reschissura Annina Giovanoli che maina il teater liber a Haldenstein s'occupa da l'istorgia gia dapi ch'ella ha vesì il film sco dunna giuvna l'onn 1961. Ussa finalmain ha ella pudì acquistar ils dretgs da l'istorgia e preschenta ils 12 da zercladur sia interpretaziun da l'istorgia sin la tribuna da la curt dal chastè a Haldenstein – accumpagnà live da duas musicistas cun ina violina ed in orgelet da maun.
