Venderdi passà, ils 13 da mars, ha Bertilla Giossi pudì retschaiver a Mellnau (Bregenzerwald) danovamain ina distincziun en la categoria lavur da pressa per il film «Bun fin miserabel – il stan dal guaud grischun». Suenter il premi principala a Bergamo al Festival delle Foreste è quai la segunda distincziun per il film ch'è vegnì producì per ils Cuntrasts da RTR.
Il «Schutzwaldpreis Helvetia» onurescha ils megliers projects en connex cun il guaud da protecziun.
Dapi l'onn 2006 undrescha la ARGE las uniuns forestalas da las regiuns alpinas cun quest premi; projects exemplarics per mantegnair e per meglierar il guaud da protecziun en il territori alpin e per sensibilisar per la tematica dal guaud da protecziun.
Ils projects vegnan valitads tenor lur originalitad, tenor lur creativitad, tenor lur caracter da model e tenor l'integraziun da differentas gruppas (participaziun).
Per la giuria èn stads decisivs la qualitad impressiunanta da la contribuziun da RTR, che impressiunescha era cun tuns fins, sco era l'idea d'accumpagnar selviculturs e selviculturas. Uschia vesan ils aspectaturs il guaud cun lur egls e sentan lur quitads. Uschia èsi era per laics cler tge che capita sch'ins surlascha memia ditg a sasez il guaud da protecziun.
Grond success per «Bun enfin miserabel» a Bergamo 2024
A Bergamo ha gì lieu il Festival dal Foreste (2024), il festival dal guaud che sa deditgescha dapi il 2018 cun ils guauds sin l'entir mund. El vul dar a la populaziun la pussaivladad da scuvrir e sentir il guaud. Quai cun agid da films, fotografias e poesia.
A chaschun da l'ediziun da l'onn 2024 ha il film «Bun enfin miserabel» da la schurnalista grischuna Bertilla Giossi gudagnà il premi principal.
Il film ch'è vegnì producì per ils Cuntrasts da RTR sa fatschenta cun la dumonda: «Co statti cun il guaud grischun?» – e preschenta trais guauds cun differentas sfidas.
Ulteriurs premis
Sper il premi general da film hai dà pliras ulteriuras categorias. La han gudagnà:
- Premi da la giuria: Zona Wao da Nagore Eceiza Mujika da la Spagna
- Premi da l'Universitad da Bergamo: Donde se quejan los pinos da Ed Antoja da la Spagna
- Premi Itis Paleocapa: Homo Humilis da Manuele Cecconello da l'Italia
Concurrenza da fotografias:
- Faggeta nella nebbia da Gino Passignani
Concurrenza da poesias:
- Categoria giuvens: Elisa Ponti cun «Un respiro leggero» e Giulia Manzoni cun «Il respiro degli alberi»
- Categoria creschids: Barbara Barducco cun «Gli occhi di dio»
Premi per cuminanzas da guaud persistentas
Dapi il 2016 surdat la PEFC Italia in premi a persunas u organisaziuns che fan buna lavur per ina cultivaziun dal guaud persistenta. Il 2024 va quest premi al Parco Alpi Cozie per il Project Leno 2020. Cun scolaziuns e workshops vegn la populaziun sensibilisada per l'impurtanza dal guaud.