Igl è ina sort puntanada d'atschal filigrana da 40 meters autezza ch’è enzugliada da bindels da taila da colur verd turchis. Il Katharinen-Turm vegn a s’auzar sco installaziun d’art vers il tschiel da Turitg fin ils 10 da december 2024. E quai en in lieu remartgabel. Là, nua ch’igl è vegnì scrit istorgia da refurmaziun e nua che la segunda tur dal Fraumünster steva fin en il 18avel tschientaner.
Da l'abazia a la baselgia communala, alura bastava er ina tur per il Fraumünster enstagl da dus. Gist en il cas dal Fraumünster sa laschava deducir il svilup da la societad vid las caracteristicas d’in edifizi.
La tur è da caracter simbolic: Ella duai – uschia scrivan las iniziantas dal project – «manifestar l'impurtanza da las dunnas ch'han gidà a sviluppar Turitg en moda economica, politica e sociala e che gidan a crear e furmar la citad fin oz».
I va per umans e lur engaschament social e nunstanclentaivel. Savens èn quels ids en emblidanza. Ed i va per la dumonda, co ch'ins po puspè trair en la memoria collectiva quels umans e lur merit.
500 nums da talas dunnas engaschadas per Turitg èn stampads sin ils bindels da taila: per exempel quel da l'interprendidra e cumbattanta per ils dretgs da las dunnas Verena Conzett ubain quel da l'anteriura presidenta dal cussegl sinodal Franziska Driessen-Reding. Ma er ils nums da dunnas grischunas èn da leger sin la taila, per exempel il num da la pacifista e feminista Clara Ragaz u da la reverenda Cornelia Camichel-Bromeis. Sin la pagina d'internet dal project pon ins far ulteriuras propostas da nums che mancan anc.
Er ils nums da pliras dunnas grischunas decoreschan la tur turitgaisa.
Il fundament transibel da la tur è deditgà a las 29 abadessas ch'han manà il Fraumünster dapi la fundaziun l'onn 853 fin l’onn 1524. Las benedictinas han gì ina gronda responsabladad politica a Turitg durant ils tschientaners – fin che l'ultima abadessa, Katharina von Zimmern, ha surdà l'onn 1524 las clavs da l’abazia cun tut sia gronda facultad al cussegl da la citad. Uschia ha ella pussibilità la refurmaziun turitgaisa senza tumults pli gronds e sponder sang sco quai è stà il cas en auters lieus. Il Katharinen-Turm porta il num da la davosa abadessa dal Fraumünster ed è in mussament che l'istorgia da la refurmaziun è er l'istorgia da las dunnas.
Katharina von Zimmern collia plirs aspects istorics: Cun ella s’unescha l’istorgia da las dunnas cun istorgia da la refurmaziun ed er l’istorgia da l'architectura. Ella era ed è fitg impurtanta per Turitg ed ins po bain era considerar ella sco refurmatura.
