Quatter giadas visita la SRG SSR quest onn las regiuns linguisticas svizras, per prender il puls da la populaziun sut il motto «Transiziuns». In entir di raquintan redacturas e redacturs da RTR, da radio SRF1, da Rete Uno e da RTS Première da lur inscunters ed invistas. Tut quai fa part dal nov project interregiunal dals radios «Les autres. Die anderen. Gli altri. Ils auters – Le Tour de Suisse» che la SRG SSR preschenta durant l'onn 2026.
Punts grischunas
La segunda ediziun da «Ils auters - Le Tour de Suisse» maina ils redacturs e redacturas ils 27 da matg en Surselva, concret a Mustér. L'ediziun ha il tema «punts» e vegn emessa direct da la pli lunga punt pendenta dal Grischun, da «La Pendenta».
-
Bild 1 von 8. Dus dals giasts d'oz, Claudio Simonet e Carmen Flepp-Cavegn, ensemen cun la moderatura Gaby Degonda. Bildquelle: RTR.
-
Bild 2 von 8. Bildquelle: RTR.
-
Bild 3 von 8. Bildquelle: RTR.
-
Bild 4 von 8. Bildquelle: RTR.
-
Bild 5 von 8. Bildquelle: RTR.
-
Bild 6 von 8. Bildquelle: RTR.
-
Bild 7 von 8. Bildquelle: RTR.
-
Bild 8 von 8. Bildquelle: RTR.
La punt pendenta tranter Mustér e Mumpé Medel fa vegnir pli da strusch ils dus vitgs. Il president communal da Medel raquinta dal temp avant la punt. E la linguista Marietta Cathomas Manetsch declera co ch'ins fa punts linguisticas en in chantun triling.
Durant las emissiuns da quest di raquintan differents giasts davart punts che collian las 150 valladas dal Grischun – mo era davart punts linguisticas e culturalas en il chantun triling.
Betg mo en il Grischun datti bleras punts. Era la citad da Basilea è ina citad da punts. Il Rain parta la citad en ina part gronda ed ina pitschna – Basilea maior (Grossbasel) e Basilea minor (Kleinbasel). Lisa Wickard da SRF ha traversà la punt centrala da Basilea e raquinta da sias experientschas.
Ed en il Tessin è la Ponte-Diga di Melide vegnida sut la marella.
Cunfins – il Tessin
L'acziun cuminaivla dals quatter radios ha cumenzà en il Tessin. En il center èn stads ils cunfins cun l'Italia – e discurrì è vegnì da la cultura, da l'economia e dal mintgadi da quels che traversan mintgadi ils cunfins per gudagnar il paun dal mintgadi.
Ils auters
La finamira dal project «Les autres – Tour de Suisse» è da scuvrir, tge che divida e tge che collia las differentas regiuns linguisticas svizras. Cun istorgias or dal mintgadi e discussiuns envida la SRG SSR il public d'explorar la ritgezza da la Svizra plurilinga. Las emissiuns pon ins tadlar sin RTR, SRF1, Rete Uno e La Première – sco era sin las plattafurmas digitalas dals singuls emetturs.