Dapi 25 onns è il Grischun sia patria. Uriunda è Ilhan Mohamed Aden da la Somalia. Ma la guerra ha stgatschà da ses da chasa. Cun tut las experientschas, ch’ella ha fat dapi lura è ella ina persuna sco predestinada per sustegnair ad auters umans, ch’èn fugids suenter ella.
Ilhan Mohamed Aden, la moderatura da la Somalia
Perquai è Ilhan Mohamed Aden oz moderatura – moderatura da las rundas da discussiun «Femmes-Tische/Männer-Tische». Las rundas da discussiun sa drizzan ad immigrantas ed immigrants. Ellas duajan furmar ina punt en il co e cum dal mintgadi grischun.
In’idea, ch’è naschida avant 26 onns en il chantun Soloturn e ch’è sa sviluppada ad in’istorgia da success – uschia er en Grischun, nua ch’i dat las discussiuns integrativas dapi quest onn.
Declerar il Grischun – en somali, portugais u tamil
Tut en tut datti actualmain 12 gruppas cun 12 moderaturas e moderaturs che lavuran comunablamain vi da dumondas d’integraziun. Tar tuttas e tuts è il Grischun la patria actuala. Lur ragischs percunter èn sco tar Ilhan Mohamed Aden en la Somalia u tar auters en l’Eritrea, en il Portugal u en la Sri Lanka.
En la Vita e cretta raquintan la moderatura Ilhan Mohamed Aden da la Somalia ed il manader dal post d’integraziun, Felix Birchler, da las emprimas experientschas en il Grischun.