Cumenzà ha tut avant 40 onns. Ils 08 da favrer 1986 è stà l’emprim grond til da tschaiver a Trun. Ina gruppa d’iniziants da Trun e Sumvitg han gì l’idea ed han motivà 15 gruppas da sa participar al til. L’emprim president dal comité d’organisaziun è stà Mario Albin da Trun.
Da quest temp n’aveva Trun anc betg in’atgna musica da tschaiver uschia ch’ils organisaturs han envidà ina musica da tschaiver da Lucerna – ils «Seegeister». Els eran marschads ordavant ed avevan er sunà suenter il til. Gia da lezzas uras avevi dà la saira ina gronda festa cun premiaziun da mascras en halla da gimnastica.
Dapi 35 onns in'atgna musica da tschaiver – Las lieurs da Trun
L’enviern 1991 han insaquants giuvens da Trun gì la finamira da fundar ina atgna musica da tschaiver per pudair sa participar al tschaiver da Trun. Tar ils iniziants che han tratg il char tutgan Gion Simeon, Iso Mazzetta e Patric Vincenz. Bainspert han els chattà avunda persunas che èn era stadas fascinadas da la musica da tschaiver. Lura hai gì num da s'organisar: Dal num, sur instruments fin a la dumonda en tge furma insumma sa participar al tschaiver. Er quai è reussì pass per pass. L’emprim tschaiver cun la musica indigena è stà per tuts in grond success ed ha animà da cuntinuar.
-
Bild 1 von 4. Bildquelle: Mess a disposiziun da Las Lieurs da Trun.
-
Bild 2 von 4. Bildquelle: Mess a disposiziun da Las Lieurs da Trun.
-
Bild 3 von 4. Bildquelle: Mess a disposiziun da Las Lieurs da Trun.
-
Bild 4 von 4. Bildquelle: Mess a disposiziun da Las Lieurs da Trun.
Il 1995 èn las Lieurs da Trun sa participadas al Péz a cup, il quiz da la Televisiun Rumantscha ed han giugà cunter ils Vagabunds, la musica da tschaiver da Sedrun.
L'onn da fundaziun, il 1991 han Las Lieurs da Trun cumenzà cun 18 commembras e commembers. Oz, en l'onn dal 35avel giubileum, dumbra la gugga 32 musicantas e musicants. E magari sa chattan schizunt pèrins per la vita durant far tschaiver.
Las ustarias dal vitg na dastgan betg mancar
Il di da tschaiver a Trun èn las ustarias dal vitg occupadas da la damaun fin tard la notg. Chattar in plaz en ina da las ustarias po magari esser ina sfida. Gist suenter il cortegi s’emplainan las ustarias. 2017 ha RTR visità l’ustaria Vuclina che è vegnida reaverta era pervia dal tschaiver. Oz è l’ustaria puspè serrada.
Ed er sper il di da til giri en las ustarias da Trun durant il temp da tschaiver. Uschia ha la musica da tschaiver tant la mesemna avant gievgia grassa sco er il mardi tschaiver in punct da program fix per festivar la tschintgavla stagiun en las ustarias dal vitg.
Era quest onn ha lieu il cortegi da tschaiver tradiziunal a Trun. Quel ha lieu sonda ils 7 da favrer 2026. RTR vegn ad emetter il til live sin rtr.ch e sin PlayRTR.
Esther Berther e Valentin Schmed commenteschan e sa maschaidan er tranter la glieud.
Nus ans legrain sin blers muments divertents ed interessants cun vus!
RTR ha adina puspè visità il til da tschaiver a Trun. Qua chattais ina schelta or da l'archiv:
Uffants tutgan tar il til sco las guggas
Gia al prim grond til a Trun il 1986 èn 15 uniuns sco era classas da scola da Trun e Sumvitg sa participadas. Che uniuns e classas da l'entira Cadi sco er musicas da tschaiver indigenas e da la Bassa furman las gruppas dal til è restà fin oz uschia. Ma betg adina tut las classas da scola ed uniuns preparan in sujet u in tema per il til. Uschia variescha era il dumber da gruppas participantas adina in zic. Quest onn sa participeschan var 30 gruppas. Il 2020 ha il Minisguard deditgà ina emissiun al tschaiver e tranter auter er visità uffants da Trun.