Represchentaziuns d'opera han entant gia ina tscherta tradiziun a Haldenstein en il chastè. L'onn che vegn duai il program vegnir schlargià. Sco che la Kammerphilharmonie Grischun ha annunzià ad ina conferenza da pressa duai dar durant l'avust 2024 gieus festivs a Haldenstein.
Cavalleria Rusticana ed Indiana Jones
L'opera duai restar ina part dal program. Trais sairas da la stad 2024 vegn il focus ad esser sin l'opera taliana dal 19avel tschientaner cun tocs da Rossini, Puccini e la Cavalleria Rusticana da Pietro Mascagni.
Sper l'opera datti dentant er auters tuns. Nov datti in program da musica da film. Susanne Kunz moderescha tras questas quatter rapreschentaziuns cun tocs tranter auter or da Harry Potter, Indiana Jones e Tom and Jerry.
Beethoven e cumponists grischuns
L'emprima saira suna la Kammerphilharmonie Grischun sut la batgetta da Philippe Bach ina da las simfonias las pli enocuneschentas: la 9avla da Beethoven. Sustegnì vegn l'orchester tranter auter da la sopranista engiadinaisa Sara-Bigna Janett ed il bass Sursilvan Flurin Caduff.
Per festivar il 500avel giubileum da las trais lias datti er musica pli locala. Sper la premiera d'ina cumposiziun da David Sontón Caflisch, vegnan er preschentadadas las chanzuns d'amur dal cumponist sursilvan Gion Antoni Derungs.
Per las preschentaziuns dals 22, 24 ed ils 27 d'avust datti en pli in public viewing grautit a Cuira sin il Kornplatz. La prevendita dals tickets per il chastè cumenza il prim da december.
