Gia la stad passada è el vegnì dumandà sch'el veglia far cun a l'exposiziun da «Blumen für die Kunst» – quai è ina da las exposiziuns cun il pli grond success en il Kunsthaus ad Aarau cun renum enconuschent en l'entira Europa. Igl è pia ina gronda chaussa sch'ins vegn dumandà da pudair far cun.
Dapi il schaner è il giuven da 19 onns londervi da planisar si'installaziun. Massimo Bundi ha dad enramar l'ovra «Mädchen auf dem Hügel» da l'artist svizzer Hans Ernst Brühlmann da l'onn 1907. Igl è la suletta ovra da questa ediziun cun in uman en il purtret, tut tschels maletgs èn u cun cuntradas ubain cun in connex cun ils glatschers. Mintga flurist u flurista ha pudì inoltrar trais purtrets favurits ch'els u ellas vulessan gugent enritgir cun fluras – ed in vegn lura partì tiers.
La mort e la vita
L'ovra da Hans Ernst Brühlmann mussa ina dunna niva che sesa sin ina collina. Ses egls èn serrads, sia vista guarda engiu ed ella para trista ed absenta. Il purtret mussa la colliaziun da l'uman e la natira e quai ha era Massimo Bundi vulì prender si en sia interpretaziun. En lezza ha el plazzà in podest avant il purtret, in zic sco in altar, e preschenta en pliras vasas il decurs da la vita. Sanester cumenza quai cun colurs levas e frestgas cun la naschientscha, entamez datti dapli colurs vivas ed a dretga va quai vi en las colurs stgiras, pia la colliaziun cun la mort. Questa inspiraziun ha Massimo Bundi gì, perquai ch'il pictur è mort fitg baud, gia cun 33 onns.
-
Bild 1 von 2. L'ovra finala. Bildquelle: RTR.
-
Bild 2 von 2. Massimo Bundi avant si'ovra. Suenter be duas uras stat l'installaziun en la chasa d'art ad Aarau. Bildquelle: RTR.
Mi'ovra è speziala, entras quai ch'ella è la suletta figura en l'entira exposiziun.
Plinavant ha il medelin anc creà in chau davant l'altar – quel represchenta duas varts: la buna e la mala che mintgin ha. Represchentà cun in chau, ornà da la vart mala cun spinas da froslas e da la buna vart cun erva da la pampa.
Reglas spezialas
Sch'ins expona en in museum, lura munta quai era da resguardar ina buna pluna differentas reglas. Per l'ina vai per il material – chaussas sco laina, launa u era fieuter pudessan cuntegnair chariels (Milben) e quellas pudessan donnegiar al purtret. Quai vegn controllà minuziusamain avant ch'il material entra il museum.
Apaina ch'ils flurists èn entrads e pon installar lur ovras ston els ed ellas dentant era guardar da tegnair en tschertas distanzas, co il directur Andy Giger declera en il video:
Impressiuns da tschellas ovras
-
Bild 1 von 9. Ovra 10 – fotografia principala da reclama. Purtret dad Ugo Rondinone Titel: viertermaineunzehnhundertzweiundneunzig, 1992 Interpretaziun florala: Heidi Huber, maister-flurista, Frauenfeld. Bildquelle: RTR.
-
Bild 2 von 9. Ovra 1. Purtret da Caroline Bachmann Titel: 58 av. J.-C., 2020 Interpretaziun florala: Marianne Wyss, maister-flurista, Embrach e Monika Reitinger, maister-flurista, Weinfelden. Bildquelle: RTR.
-
Bild 3 von 9. Ovra 2. Purtret da Fritz Pauli Titel: Mondnacht bei Frauenkirch-Davos, enturn 1925 Interpretaziun florala: Luzia Mantegazzi-Neurohr, flurista, Saland. Bildquelle: RTR.
-
Bild 4 von 9. Ovra 3. Purtret da Otto Morach Titel: Fabrikumbau, 1916 Interpretaziun florala: Angela Kaspar, Turitg. Bildquelle: RTR.
-
Bild 5 von 9. Ovra 4. Purtret da Giovanni Giacometti Titel: Sera d'autunno, enturn 1903 Interpretaziun florala: Severin Stadler, flurist, Zug ed Isabelle Becker, maister-flurista, Zug. Bildquelle: RTR.
-
Bild 6 von 9. Ovra 7. Purtret da Monica Studer e Christoph van den Berg Titel: Hotel Vue des Alpes, 2000 ff. Interpretaziun florala: Nicole Matter, maister-flurista, Oberentfelden. Bildquelle: RTR.
-
Bild 7 von 9. Ovra 8. Purtret dad Albert Schnider Titel: Senza titel (Purtret en il nimbus), 2004/05 Interpretaziun florala: Claudia Lischer, maister-flurista, San Murezzan. Bildquelle: RTR.
-
Bild 8 von 9. Ovra 9. Purtret da Samuel Buri Titel: Châlet psychédélique, 1967 Interpretaziun florala: Michal Haut, maister-flurist da Bratislava / SK. Bildquelle: RTR.
-
Bild 9 von 9. Kunsthaus Aarau. La chasa d'art ad Aarau datti dapi il 1959 ed els mettan paisa da be exponer art svizzer. Ad onn han els enturn 50'000 visitaders, radund 17'000 da quels quintan els per quest onn da l'exposiziun da «Blumen für die Kunst». Bildquelle: RTR.