Avant pli u main in onn, il settember 2022, aveva il giuven da Curaglia gudagnà la medaglia da bronz als Swiss Skills, ils campiunadis naziunals da professiuns. E para è lezza giada s’envidà tar el in fieu per talas occurrenzas. Dals 23 enfin ils 27 d'avust 2023 sa participescha el numnadamain ad ina proxima «challenge». Durant tschintg dis sa mesira el cun concurrenza internaziunala tar ils campiunadis europeics da las fluristas ed ils flurists giuvens enfin 25 onns «Eurofleurs 2023» en Slovenia.
Flurs ed il fatg ch'ins sa evocar cun ellas bellas emoziuns tar ils concarstgauns, fascinescha Massimo Bundi schon da pitschen ensi. Il giuven che deriva d'ina famiglia da purs purtava a chasa a la mamma flurs dal prà ed aveva tschaffen dal plaschair ch'el svegliava uschia tar ella.
Sco flurist u flurista èn ins qua per mintga carstgaun, en mintga situaziun da la vita. Davent da la nozza enfin tar la mort. E cun las flurs pon ins svegliar fitg bleras emoziuns.
Sper las flurs ha il giuven flurist ch'ha terminà questa stad l’emprendissadi er grond plaschair da mesirar ses artisanadi e sia creativitad cun autras persunas da la branscha. Cura che l’Uniun svizra da fluristas e flurists ha scrit or la pussaivladad da participar al campiunadi europeic, saja stà cler per el, ch’el vuless esser da la partida. Cun in pau cletg è ses giavisch ì en vigur. Il giuven um da la Val Medel è in da 12 persunas che astgan represchentar quest onn lur pajais a l’occurrenza «Eurofleurs» en Slovenia.
El sa legra sin quella pussaivladad, saja mirveglius sin il «feeling» internaziunal e co che las participantas e participants d'auters pajais lavuran. El pensa che tut las persunas che participeschan a talas concurrenzas hajan la finala la medema motivaziun: prender a chasa il pocal.
«Eurofleurs 2023» en Slovenia
La concurrenza sco tala pon ins s'immaginar in pau sco las shows da televisiun, nua che las participantas ed ils participants ston crear cun ingredienzas dadas avant, temp limità e tenor in moto specific, turtas extraordinarias. Ma empè da turtas vai tar «Eurofleurs» per flurs.
Il campiunadi europeic ha lieu amez l’iert botanic «Arboretum Volčji Potok», en vischinanza da la chapitala slovena, Ljubljana, en il liber sut ina tenda. Ils candidats e las candidatas stattan ina sper l'autra en ina retscha e survegnan il medem material da basa. Persunas interessadas pon vegnir a guardar tiers co che las ovras fluristicas vegnan creadas.
Exercitar, exercitar, exercitar
Dapi che Massimo Bundi ha survegnì la conferma da pudair far part a l'eveniment internaziunal, munta quai per el: exercitar, exercitar, exercitar. Sustegn survegn el da sia coacha ch’è sez flurista ed experta per examens finals d’emprendissadi fluristic. Ensemen cun ella trenescha l'um giuven da 19 onns er sut tschiel avert, quai per simular las cundiziuns che spetgan el tar il campiunadi. Il sulegl haja ina gronda influenza, las flurs tegnian pli pauc ditg ed uschia po il resultat da las creaziuns variar.
En tut vegni a dar al campiunadi pensums, per part cun nums leghers e cun directivas fitg precisas. Per quels stattan a disposiziun a las represchentantas e represchentants mintgamai tranter 60 e 120 minutas.
- Nr. 1 «Trees Are My Friends» («plantas èn mias amias») – arranschament liber
- Nr. 2 «Summer Dreams» («siemis da stad») – matg lià a maun
- Nr. 3 «Romantic picnic in a flowering meadow» («picnic romantic sin ina prada en fluriziun») – decoraziun
- Nr. 4 «The legend of the red and white roses» («la legenda da las rosas cotschnas ed alvas») – matg da la spusa
- Nr. 5 «Lovers’ souls are floating like water lilies on a lake» («olmas d'amantas sgolan sur gilgias d'aua sin in lai«) – ovra da surpraisa
Il matg da la spusa saja il pensum che Massimo Bundi possia preparar ordavant. Per quel stoppia el er purtar l'agen material. Per tschels pensums survegn el las chaussas ch'el po duvrar pir avant lieu. Lura stoppia el guardar tge ch'el possia crear ordlonder. Premià vegn a la fin tant la prestaziun sur l'entira concurrenza sco er ils singuls pensums.
Il pli grond plaschair avess jau sche jau vegniss da persvader la giuria per mes matg da la spusa cun rosas cotschnas ed alvas. Jau sun vidlonder da dar la davosa glimada vid la tecnica per lez.
Durant il viadi en Slovenia vegnia el accumpagnà da sia coacha. Sia famiglia na saja betg uschè flexibla per viagiar, pervia dal bain puril – els hajan dentant empermess da struclar ils poleschs e d'envidar chandailas per ch'i gartegia.
Or da l'archiv:
