En ils novs cudeschs rumantschs per uffants na funcziuna betg tut sco quai ch’i stuess: In vegl mulin da vent gira tuttenina era tut senza vent, in tren-fantom na fa betg pli tema ed in stgilat mangia las nuschs e las nitscholas enstagl da far proviant per l’enviern. Ils geniturs na pon betg leger en ruaus, perquai ch’ils uffants na vulan simplamain betg durmir e la lumpazza Charlie daventa da Nadal tuttenina ina mattetta tut chara.
Tge è qua davostiers? La Marella prenda uffants e creschids sin in’aventura da leger, sa chapescha senza tradir las schliaziuns.
Ils trais ??? – Il muglin Palantin
Las alas dal mulin da vent vegl giran tuttenina era, sch’i n’ha insumma nagin vent. Co po quai esser? Cun retschertgas pli exactas vegnan ils trais amis Justus, Peter e Bob sin ina legenda straordinaria e sa chattan amez in nov cas.
Il sabiuttin
Gianna e Chasper Chönz ston supportar bler cun geniturs che na vulan avair nagin chaun, ma mangiar da cuntin rischcotschnas. Plinavant san els adina tut meglier. Quai vul dir ils geniturs. Ils uffants era. Il lain vegn dal bist. Respectivamain l’astella dal lain. Dapi in mument abiteschan ils Chönzs en ina chasa veglia cun in palantschin plain aventuras. E si là fan ils uffants ina curiusa scuverta: En ina stgatla da cudeschs stat in umet cun ina buccuna. In vair sabiuttin che pretenda che mo tals sco el al vesian! Tgi sa, sche bab e mamma pon era vesair il sabiuttin?
Max, il squilat
Il stgilat na rimna nitscholas per l’enviern. Quai dat da discurrer en il guaud. Entant ch’ils auters stgilats rimnan diligentamain e fan provisiuns, mangia Max tut las nitscholas. Cura che l’enviern vegn, sesa el là cun pattas vidas. Co vegn el a surviver la stagiun fraida?
Max ed ils spérts
Per salvar il vegl tren da spierts da ses geniturs ha Max in’idea: I dovra vairs spierts! Immediat va il giuven curaschus a la tschertga e chatta bainprest spierts che fan propi sgarschur.
Ina pitschna miracla da Nadal
Igl è curt avant Nadal e las schumellinas Sam e Charlie èn vaira agitadas! Sco adina è Sam stada ina fitg brava quest onn. E Charlie? Ma bain, per dir la vardad: Charlie è stada vaira sfarfatga. Betg propi nauscha, ma ina veritabla lumpazza. Tgi sa, sch’ella survegn almain in regal? Mintgatant (fitg darar) sto Santa esser dir. Ed inqual giada (vairamain mo mintga quattertempras) fa schizunt el in sbagl.
Affers da famiglia
Durant ina gita al Lej da Prestinaun chatta Seraina ina bulscha che cuntegna ina fotografia veglia d’in mat. La giuvna vegn a savair che quai è Marco, il giuven paster da l’Alp Arpiglia. Ma sin la fotografia è da vesair l’Alp Belvair ch’è arsa avant tschintg onns. Al lieu d’incendi avevan ins chattà quella giada bancnotas d’in assagl d’ina banca a Samedan che n’è mai vegnì sclerì.
Anc pli misterius è però che la bulscha tutgava al chanzlist da S-chanf ch’è sa disgrazià sut circumstanzas dubiusas sin il Piz Mezzaun. Ina casualitad? Seraina e Marco cumenzan ad investigar e fruntan sin manzegnas, tradiment e scumbigls famigliars.