Sch’il giabus valeva pli baud cunzunt sco «nutriment dals povers», pon ins ozendi observar in vair trend en connex cun quest legum. Quai betg senza raschun, pertge ch'el na gusta betg mo bain, el è era bun per nossa sanadad.
En La Marella vegnan trais persunas a pled, tuttas han ina relaziun speziala cun il giabus:
Avant 10 onns na vuleva nagin mias plantinas da giabus. Ussa è el trendy!
Stephan Stutz – pur en Tumleastga
Avrir la boxSerrar la box
Cura ch’el è arrivà en il Grischun, è il pur Stephan Stutz stà surstà da constatar che l’interess da metter diversas sorts da giabus en iert era fitg pitschen. Ma ozendi saja quai auter, era grazia al trend en connex cun las sorts da giabus plimà (Federkohl) che sa tschentan pli e pli savens sin noss tagliers.
A persunas che vulessan era cumenzar a metter giabus en iert, cusseglia il pur e commember da la fundaziun Pro Specie Rara da revegnir a las veglias sorts e da gughegiar d’experimentar e cuschinar il giabus en novas modas.
Il giabus – tge magnific legum, tge magnific medicament!
Angelika Overath – autura
Avrir la boxSerrar la box
Tar l’autura Angelika Overath datti bunamain mintga di giabus sin maisa. Ma igl è suenter avair rabitschà davent in’infecziun grazia al suc da giabus, ch’ella ha cumenzà a retschertgar davart ils effects positivs dal legum sin nossa sanadad. Avant intgins onns ha ella publitgà il cudeschet «Krautwelten» ed è pli persvasa che mai: il giabus n’è betg mo bun en il taglier, el è era bun per nossa sanadad.
Nossa pomada è vegnida creada tenor la terapia da Thomas Häberle. Qua a Müstair era quel enconuschent sco 'docter da giabus'.
Fadrina Tschenett – droghista
Avrir la boxSerrar la box
Mintga mais producescha la Drogaria Conrad a Müstair la «crema da giabus», in remedi inspirà da la terapia dal pader Thomas Häberle (1912 – 1997). Quest pader benedictin era da sias uras enconuschent sco «docter da giabus» e tractava mals da tuts geners cun quest legum.
La crema, en il commerzi dapi il 2017, è en sasez ina crema per la pel, ma adina dapli clients l’utiliseschan era per mals ch’era Thomas Häberle tractava cun giabus: reumatissem, artrosa, contursiun ubain era dafraid.
RTR La Marella 09:00
Dapli dal tema
laschar ir Audio 'Docters dad ervas e paders da giabus'
ord 'Vita e cretta' dals 08.04.2018, 08:06 (link tar l'emissiun)
Docters dad ervas e paders da giabus
Vita e cretta(Link tar la emissiun) a las 08.04.2018, 08:06