Per las dunnas è la refurmaziun stada ina cesura ed ina gronda transfurmaziun. Per l’ina ha il moviment da la refurmaziun impedì l’emancipaziun, perquai che cun la refurmaziun è svanida ina gronda part da las claustras. E gist sco mungias en las claustras avevan dunnas fin lura pudì sa scolar, s’engaschar a moda sociala e s’exprimer publicamain en connexs religius e politics. La vita claustrala è sa restrenschida, persuenter han ins concedì novs dretgs e novas pussaivladads a las dunnas entaifer la lètg e la famiglia cun la refurmaziun. Quels eran però limitads sin il ravugl da la famiglia.
Bleras dunnas èn stadas partenarias da discurs impurtantas per lur consorts, han dà impuls e contribuì davos las culissas a la lavur dals refurmaturs. Qua tras han ellas influenzà considerablamain la refurmaziun.
Pli gronda influenza han gì las dunnas dals reverendas e refurmaturs. Idelette de Bure, la consorta dal refurmatur genevrin Johannes Calvin, ubain Wibrandis Rosenblatt, ch’è perfin stada maridada cun ils trais refurmaturs Johannes Oekolampad, Wolfgang Capito e Martin Bucer. Dunnas sco ellas han sustegnì las stentas refurmatoricas da lur umens davos las culissas ed ins las ha considerà sco las dunnas da reverenda idealas: lavurusas, modestas e cun bunas enconuschientschas da la bibla.
Ma igl ha era dà dunnas ch’èn s’engaschadas publicamain en connex cun la refurmaziun. Auturas sco Marie Dentière, edituras sco Margarethe Prüss u era l’anteriura abadessa Katharina von Zimmern han fatg part activamain a la refurmaziun cun publitgar atgnas ideas e scrittiras teologicas.
In nov vent da libertad ha suflà per las dunnas cun la refurmaziun. Ma quella ha medemamain mess en chadainas la libertad da las dunnas: sco unic concept da vita per las dunnas ha la refurmaziun prevesì l'existenza sco chasarina e mamma.
Co che las dunnas han influenzà e furmà la refurmaziun en Svizra, co che lur situaziun è sa midada durant quel temp da refurma er en il Grischun, e co che la rolla da la dunna è insumma sa sviluppada dapi lura entaifer la baselgia refurmada, da quai raquinta la teologa Miriam Neubert en Vita e cretta.
