Tgi che sa lascha gugent inspirar, sa maschaida gugent en la fulla dal public u giauda gugent in teater ha la schelta tranter ina retscha d’occurrenzas culturalas ch’han lieu questa stad en Grischun.
5 da zercladur: Vernissascha «Attenziun auto!»
Nagliur è il cumbat per l’auto stà uschè intensiv sco en Grischun. Suenter che la regenza grischuna aveva bandischà l’auto da las vias enturn l’onn 1900, hai durà 25 onns e 9 votaziuns fin ch'il scumond è puspè vegnì abolì. Il Museum Retic mussa en ina exposiziun speziala la relaziun ambivalenta tar l’auto ed envida da sa fatschentar cun l’automobil en il temp passà sco er en il temp dad oz.
6 e 7 da zercladur: Buskers Chur
«Busker» è englais e munta tant sco musicist u musicista da via. A la festa «Buskers» en la chapitala grischuna na datti però betg be d’udir musica, mabain er da vesair acrobatica, teater u comedy. Gia per la 10avla giada s’emplainan las vias e giassas da la citad veglia da Cuira a chaschun dal spectacul d’art internaziunal cun fullas da persunas. Ins po visitar il festival senza stuair cumprar in bigliet. Per finanziar l’entira occurrenza vendan ils organisaturs però bratschlets. Sper las preschentaziuns artisticas datti numerus stans cun da baiver e da mangiar.
| Data | Occurrenza | Lieu |
|---|---|---|
| 5 da zercladur | Vernissascha «Attenziun auto!» | Cuira |
| 6 e 7 da zercladur | Buskers Chur | Cuira |
| 6 da zercladur fin 26 da settember | 150 onns Thomas Mann | Tavau |
| 7 da zercladur | Festival da Nanins | Scuol |
| 12 fin 27 da zercladur | Teater VIA MALA | Haldenstein |
| 21 da zercladur | Mountain Brass in Concert | Domat |
| 12 e 13 da fanadur | Festival cun sal e paiver | Sent |
| 19 e 20 da fanadur | Festa d’uffants | Laax |
| 25 da fanadur fin 9 d’avust | Operaviva mussa Aida | Sursaissa |
| 23 e 24 d’avust | Di da jodladras e jodladers grischuns | La Punt Chamues-ch |
7 da zercladur: Festival dals Nanins a Scuol
Da societads da musica fin musica tirolaisa – ina sort «mini-Woodstock» da la musica instrumentala porta l'entschatta zercladur schlantsch a Scuol. Al Festival da Nanins sa presentan 14 furmaziuns da mezdi fin la notg – tranter quellas chapellas da sturs localas, gruppas da saut u musica dal Tirol. Igl è l’emprima ediziun dal nov festival. Ils organisaturs quintan cun var 600 visitadras e visitaders.
6 da zercladur fin ils 26 settember: Tavau festivescha Thomas Mann
Fans da litteratura, attenziun! Quest onn èsi 150 onns ch'il titular dal Premi Nobel da litteratura, Thomas Mann, è naschì. Sia visita a Tavau e las experientschas da sia dunna, ch’è stada pazienta en in sanatori a Tavau, han inspirà l’autur tudestg da scriver il roman «Der Zauberberg» – quel roman ch’ha dà a Tavau muntada litterara. Tranter ils 6 da zercladur ed ils 26 da settember datti a Tavau las pli differentas occurrenzas davart la vita e l’ovra da l’autur. In punct culminant furma in bal mascrà ch’ha lieu ils 7 da zercladur sin la Schatzalp. Il public è envidà da sa costumar sco en ils onns 1920.
Plitost gust da visitar in festivals u openairs? Lura datti qua la survista:
12 fin 27 da zercladur: Teater Via Mala a Haldenstein
La curt dal chastè da Haldenstein sa transfurma durant la stad en in teater. La gruppa libra da Haldenstein preschenta l’emprima versiun da teater grischuna dal roman «Via Mala» da John Knittel. Sco il titel dal teater di, aveva il territori brut tranter Tusaun ed Andeer inspirà John Knittel da scriver. Naschì era in roman, ch’el ha publitgà il 1934 per englais. La versiun nova da l’istorgia dramatica en furma da teater vegn ord la plima dad Annina Giovanoli. Sin tribuna stattan profis sco era amaturas ed amaturs.
21 da zercladur: Mountain Brass in Concert
A Domat sa mesiran las meglras brass bands svizras en ina concurrenza. Auter che tar concurrenzas da brass band tradiziunalas metta il «Mountain Brass in Concert» il divertiment, la creativitad e l’innovaziun en il center. Mintga band preschenta in program creativ cun in concept tematic – savens cun sustegn da glisch u d’elements audiovisuals. La concurrenza sa drizza a bands da brass da la 1. classa fin a bands da la classa excellenta.
Il concert da la societad da musica, il teater da l'uniun da giuventetgna, prelecziuns litteraras, la saira da lotto organisada da l'uniun da tir u la bursa da vestgadira d'uffants. Ils termins per tals eveniments ed anc blers auters èn da chattar sin la nova plattafurma digitala chalender.ch
12 e 13 da fanadur: Festival cun sal e paiver a Sent
Il festival sut il titel «cun sal e paiver» fa il spagat tranter ils pli differents stils da musica. Visitaders e visitadras pon tadlar musica populara fin a jazz. En la baselgia a Sent èn d’udir la sonda e dumengia saira tschintg concerts. Da la partida èn 15 fin 20 musicistas.
19 e 20 da fanadur: Festa d’uffants a Laax
Mintga stad sa transfurma la riva dal lai da Laax durant ina fin d’emna en in paradis per uffants. Passa 40 attracziuns spetgan ils giasts tranter 2 e 13 onns. Ils uffants pli pitschens pon visitar preschentaziuns u laschar pitturar la fatscha. Uffants pli gronds pon sa divertir cun raiver harassa, ir cun canu u far auters gieus d’inschign.
25 da fanadur fin 9 d’avust: Opera Viva mussa Aida
Senza dubi è «Aida» ina da las pli enconuschentas operas ch’i dat. Questa capodovra da Giuseppe Verdi preschenta l’uniun Opera Viva, ch’i dat dapi 20 onns, a chaschun dal giubileum: Gia per la 10avla giada sa transfurma Sursaissa durant la stad sut la direcziun da Gion Gieri Tuor ad in Mecca d’opera.
23 e 24 d’avust: Di da jodladras e jodladers grischun
Per l’Uniun da jodlar grischuna èsi il punct culminant da l’onn. Sut l’ensaina da cultura e tradiziun s’inscuntran radund 250 jodladers e jodladras, sco era numerus bittabandieras, a l’occurrenza annuala ch’ha lieu quest onn per la 50avla giada. Il spectacul musical e giagl attira mintg’onn er in grond public – quest onn a La Punt Chamues-ch.