Martin Cantieni ha survegnì il Premi Term Bel 2020 per ses text «In senza» che descriva il viadi d’in senza bigliet cun il tren vers sid. En la laudatio per il text dì la giuria:
Il text «In senza» ha in bun ritem, era u forsa gist perquai ch`el na cuntegna nagins verbs. Questa restricziun dat in’ulteriura significaziun al titel «In senza». In senza bigliet, in senza bagascha, in senza adressa, in senza verbs.
Il premi dal public, che è per l’emprima giada vegnì eruì cun ina votaziun online va quest onn a Roman Caviezel e ses text «Ella u jau.». Raquintà vegn qua l’istorgia d’in emploià che ha sentiments da vendetga encunter sia scheffa.
Era sche la 30avla ediziun dals Dis da litteratura a Domat ha stuì vegnir spustada sin l’onn proxim, han ins pudì tadlar, persequitar cun tensiun e la finala era as participar al Premi Term Bel 2020. Dals 18 texts inoltrads aveva in’emprima giuria selecziunà tschintg finalists. Las ulteriuras finalistas e finalists eran:
Ils texts en vegnids discutads dad ina giuria d’experts che è sa cumponida da l’autura e manadra da cultura tar la Lia Rumantscha Gianna Olinda Cadonau, da la linguista Anna-Alice Dazzi e dal docent da litteratura a l’Universitad da Friburg Renzo Caduff.
Il Premi Term Bel vegn sponsurà da la Vischnanca burgaisa Domat ed ha lieu mintga dus onns. Il premi da la giuria è dotà cun 3'000 francs. Il premi dal public è dotà cun 1'500 francs.
