Cun Andrietta, la mamma e matriarca en la seria, n’ha Marietta Jemmi betg bler cuminaivel. Andrietta saja ina dunnetta, ina che guarda che tut saja bi e bel a chasa, ina brava dunna e mamma. Ma nagin na vesia Andrietta. Il bel da la figura saja ch’ella fetschia ina metamorfosa.
Igl è stà bel da giugar per rumantsch.
La lavur al set saja stada «heftia». I saja bel da far films. Ma ils dis sajan lungs. La bun’ura a las sis saja dad ir en la mascra ed in di da filmar possia ir fin la saira las set. I dovria blera concentraziun e lura saja era da spetgar bler.
Il ritmus sa mida ferm da plaina concentraziun e lura puspè spetgar.
In criteri che Marietta Jemmi ha survegnì la rolla da l’Andrietta è stada sia abilitad da giugar senza pleds. «Igl ha dà situaziuns ch’jau hai proponì da laschar davent il text per simplamain dar in’egliada», declera Marietta Jemmi.
Rumantsch è sco in’exclusivitad. La glieud ha grond interess e grond plaschair dal rumantsch.
Cun be 18 onns ha Marietta Jemmi pers sia mamma. Suenter questa sperdita è la dinamica en la famiglia sa midada. «Las mammas tegnan ensemen la famiglia. Ellas guardan che tuts han in plaz en la famiglia. E quai avain nus pers cun la mort da nossa mamma», di Marietta Jemmi en il Profil. «Igl è suenter stà grev da mantegnair e tegnair ensemen la famiglia».