Mattiu Defuns di da sasez ch’el saja artist da vita. El manegia cun quai ch’el vegn da finanziar sia vita cun chaussas ch’el fa gugent. Ma el saja en emprima lingia musicist. Sia vusch descriva el sco «rauca, loma, chauda».
El saja chantautur, fetschia dentant musica en ina direcziun sferica cun tuns lungs, cumbinà cun registraziuns audiovisualas da la natira, maschadà cun in zic indi. Pia ina maschaida da singer-songwriter-sferic-indi.
Sco uffant è la musica adina stada in plaschair, mai in stuair.
Il mument che Mattiu Defuns ha vis, bain, la musica pudess esser mia via è stà durant il temp en la scola da talents a Glion. Là ha el cumenzà a scriver sias atgnas chanzuns.
«Il pli gugent hai jau sche mias chanzuns neschan spert e bain», di Mattiu Defuns en il profil. «Per mai èsi er adina stà cler ch’jau chant rumantsch.» Igl è in avantatg da chantar rumantsch. I vegn vi bain tar ils blers. Era perquai che rumantsch è ina lingua melodiusa.
La schanza ch'el vegnia dentant en ina gronda playlist tar spotify cun chanzuns rumantsch na saja betg gronda, gia pervia da la lingua.