Musica da brass – professiun, passiun, ambiziun
Festa da musica districtuala a Salouf, concerts da primavaira, ma surtut duas festas ch'han lieu a Domat procuran per tensiun e plaschair en il medem mument tar il dirigent da professiun Gian Stecher: La festa da giubileum «222 onns Musica da Domat» ed in di pli tard, la premiera svizra da la concurrenza per furmaziuns da classa auta «Mountain Brass in Concert».
In format tar il qual sis differentas furmaziuns sa preschentan cun in concert e show da 35 minutas. Tensiun avant las grondas concurrenzas en la scena da brass, enconuscha Gian Stecher fitg bain. Pliras giadas è el sa preschentà cun la «Graubünden Brass» e cun la «Universal Brass Band» da Wil al Campiunadi svizzer da brass a Montreux cun grond success. Uss èn quellas duas furmaziuns era prontas per la premiera svizra «Mountain Brass in Concert».
Il temp il pli intensiv è la preparaziun e lavur da detagl cun las furmaziuns. Tar concerts u concurrenzas, hai jau lura sulettamain da far mia lavur – diriger.
Gian Stecher è creschì si a Domat. Sia mamma Luisa è oriunda da Vella, ses bab Roman è oriund da Tarasp. Er el ha dirigì blers onns la Musica da Domat. Uschia è Gian Stecher ì in zic sin ils fastizs da ses bab. Sco giuven passiunà per la trumbetta e la musica da brass ha el decidì da far il studi da musica sin trumbetta classica. Cun 27 onns ha el absolvì il bachelor sco dirigent ed il master sco pedagog da musica per instruments da flad.
Actualmain maina il dirigent da 42 onns sis differentas furmaziuns da musica da brass da differentas categorias: La brass band giuvenila dal Plaun ( JBBI), la furmaziun da cadets tar la Scola chantunala a Cuira, la Musica da Domat, la Graubünden Brass, la Universal Brass Band da Wil e la MG Koncordia da Widnau. Tant la Graubünden Brass sco era la Musica da Domat insceneschan la musica da brass a moda speziala per il public.
Cun projects spezials ed aventurus, mussain nus che musica da brass è bler dapli che marschs e polcas.
Muments en brass
-
Bild 1 von 4. Montreux 2022 – Concurrenza svizra per brass Band . Cun la nova cumposiziun «Nu» da Ludovic Neurohr, ha la Graubünden Brass conquistà per secunda giada il titel da vice-campiun svizzer en la categoria d'elita. Bildquelle: Graubünden Brass.
-
Bild 2 von 4. Prokect «Graubünden Brass & Classic» dal 2023. L'ambiziun dal dirigent Gian Stecher e da la cumissiun da musica da la Graubünden Brass è da realisar eveniments spezial che restan al auditori. Bildquelle: Graubünden Brass.
-
Bild 3 von 4. Gian Stecher en ses element. «Pudair star sin il palc da Montreux u dal KKL a Lucerna e pudair furnir ina buna prestaziun, quai es per mai il pli grond.». Bildquelle: Graubünden Brass.
-
Bild 4 von 4. Montreux 2023 en il KKL a Lucerna. Cun«Blue Horizon» da Betrand Moren ha la Graubünden Brass conquistà plaz 5.en la categoria elita. Bildquelle: Graubünden Brass.
Sper direger las differentas furmaziuns da brass, è Gian Stecher pedagog da la scolas da musica Viamala a Tusaun e tar la Scola da musica dal Plaun a Domat. Sco manader da la scola da musica Viamala a Tusaun, resenta Stecher el in aut nivel da qualitad tar la giuventetgna. Pli gronda saja la sfida da salvar in dumber constant da scolaras e scolars.
Nus stuain esser interessants, preschents en las medias ed esser in zic cool per ils giuvens, uschia restain en il chau e pudain surviver temps pli difficils.
Tar tut las incumbensas che Gian Stecher ha en il rom da la musica da brass giauda el il temp cun sia famiglia. Ensemen cun sia dunna Livia vivan els duas gronda passiuns: Lur feglia Aurina ed il plaschair per sfunsar en mar, lais e flums.
Dapli da la vita privata da Gian Stecher, da sias ambiziuns sco dirigent professiunal e tge che fa vegnir gnervus el a chaschun da Campiunadis svizzers per musica da brass sco a Montreux e tge che spetga sin il public ils 20 e 21 da zercladur a Domat, ans raquinta il dirigent passiunà en il «profil».