Il 2016 è stada l'ultima festa da musica dal district III (Grischun central, Plaun, Plessur, Mesauc, Calanca) a Lai. Lura ha la pandemia da corona franà festivitads pli grondas. Quest onn, il 2025, ha la Musica instrumentala Salouf Mon Stierva gì la curascha d'organisar in'ulteriura festa da musica. La societad cumbinescha la festa er gist cun in'uniformaziun nova.
Istorgia
L'atun 1979, ina sonda saira, èn trais giuvens s'inscuntrads per far musica: Franco Simonet (Stierva), Adrian e Stefan Demarmels (Salouf). Ils scolars Adrian e Franco avevan dumandà Stefan sch'el po mussar ad els da sunar trumbetta. Stefan Demarmels aveva emprendì en la scola claustrala a Mustér da sunar trumbetta. L' inscunter dad els trais è s'extendì adina dapli e l'onn 1987 èsi lura stà uschè lunsch, la Musica instrumentala Salouf Mon Stierva è vegnida fundada e dapi lura è Stefan Demarmels ses dirigent. Anc adina fa la musica sias emprovas la sonda saira ed è er daventada ina musica da la vallada, ina furmaziun d'armonia. Il 1998 ha la musica cumprà l'uniforma actuala e quella vegn uss remplazzada.
La festa
Era RTR è da la partida cura che societads da musica fan festa. A Salouf ha RTR filmà las producziuns en la halla da gimnastica ed uschia ha mintga societad ed era l'entira populaziun la pussaivladad da guardar ils videos sin PlayRTR/musica ed era sin Playfestas, la plattafurma da festas da chant e musica.
L' Artg musical porta intginas producziuns da festa, uschia per exempel ils gronds victurs da la festa la Brass Band Cazis u er la Musikgesellschaft Union Chur. Dentant pudais vus er tadlar las producziuns da musicas da giuvenils u er ils trais tocs en la categoria libra da la Dorfmusik Rothenbrunnen.
Ulteriuras producziuns ord la zona da silenzi datti er en l'Instrumentala da mesemna, 18-06-2025.