Il giuven Surmiran sa mova musicalmain tranter differentas classas, categorias e qualitads da la musica instrumentala. Principalmain suna el en la Musica instrumentala Savognin il cornet ed è er activ sco vicedirigent. Dasper suna el dentant er il cornet en la Brass Band Cazis e la trumbetta en la Swiss Armed Forces Central Band.
Ma ussa spetga Renato Netzer ina premiera: la festa da Bienna. Anc mai è el avant stà ad ina festa da musica federala. A Bienna vegn el ad esser a la testa e manar ils musicists e las musicistas da Savognin en la concurrenza da marschar.
Jau trenesch cun il fist da diriger per betg far sbagls che fissan evitabels.
Per Renato Netzer è il far musica da cumpagnia il pli bel ch'i dat, n'emporta betg tge categoria che la societad ha. Ed uschia saja era l'exercitar ina dumengia saira nagin problem per el.
Bienna sco punct culminant
Cun anc mai esser stà ad ina festa da musica federala, saja Bienna ussa segir insatge tut spezial per el. Era perquai che collegas ch'el enconuscha dal militar vegnan ad esser a Bienna e forsa persequitar sia prestaziun e quella dals musicists da Savognin. Renato Netzer ha dentant er in'autra gronda finamira: «Sunar ina giada al Basel Tattoo».