Causa la gronda sporta d'activitads da temp liber han tschertas musicas dal Grischun fadia da chattar avunda giuvenils che vulessan entrar en lur societad. Al medem mument ves'ins dentant era uniuns che mussan constanza u creschan perfin. Tenor l'Uniun chantunala da Musica dal Grischun na possia'ns perquai betg discurrer d'ina clera diminuziun d'interess tar la giuventetgna. La fascinaziun per la musica instrumentala saja in mintga cas era ozindi avant maun.
Per gudagnar la giuventetgna ston ins star londervi. L'interess è dentant en mintga cas avant maun. Quai mussan era ils concerts impressiunants da las uniuns giuvnas.
Far musica en cuminanza fa bain
Era Seraina Jäger demussa che sunar en ina musica plascha era a la giuventetgna d'ozendi. La giuvna da 21 onns è part da duas musicas.
Tar la Musica instrumentala Savognin suna ella il cornet ad ala e tar la Brass Band Cazis segund cornet. Dapi in pêr onns fa ella era part al champ da la Brass Band da giuvenils dal Grischun. L'entir concert final da quest champ chatt'ins sin Play Festas.
80% da mes temp liber è far musica.
Per la giuvna surmirana è il far musica e l'esser part da la scena da musica instrumentala ina sort equiliber tar ses manster. Sper il sunar saja l'esser part d'ina societad da musica era mantegner ina tscherta cultura.
Gist il concert annual da la Musica instrumentala Savognin en la Sala Grava è era ina sort tradiziun che tutga tar il vitg.
Era Miguel Demont è musicant cun corp ed olma. Tranter auter è il giuven cornetist era part da la Societad da musica da Mustér. Sunar en cuminanza saja per el ensatge dal pli bel ch'i dat.
Jau cussegl e mintgina e mintgin d'empruvar ora sco ch'igl è d'esser part d'ina musica!
Ina da sias finamira è da sunar ina giada tar la musica militara. Causa che l'examen d'entrada dumondia ina massa, exercitescha el regularmain. Sch'ins haja ina finamira chatt'ins era la motivaziun da sunar mintga di.
Jau sun mintga di. Quai drova schon disciplina. Sch'ins sa pertge ch'ins fa quai, n'è quai dentant nagin problem.
