Or d'ina fanestra da la Scola media a Schiers resunan tuns dals bass, or d'ina autra ils corns ed or da tschella ils cornets. 42 giuvens e giuvnas musicantas en set registers treneschan per pudair sa preschentar la fin d'emna avant il public a Schiers ed a Cuira. A chaschun dal champ da musica da la Brass Band da giuvenils dal Grischun pon musicistas e musicists motivads sunar ed emprender dals profis. Quest onn tranter auter da Jonathan Bates da West Yorkshire en l'Engalterra ch'è actualmain solist da corn en es tar la Foden's Brass Band ch'è enconuschenta sin l'entir mund.
Per il dirigent Gian Stecher ha quest champ ina muntada speziala perquai che quel ha evocà en el il plaschair vi da la musica da brass e la motivaziun dad adina vegnir meglier.
Jau hai udì co ch'ils auters han sunà e pensà: uschè bun vi jau era esser ina giada.
Durant in’emna passentan ils giuvenils tranter 12-25 onns da differentas parts dal chantun di e notg ensemen ed uschia naschan era amicizias.
A l'entschatta na gughegiav jau betg da discurrer cun ils auters ma cun il temp è quai sa midà.
-
Bild 1 von 7. Leonie Halser da Glion è ina da las Rumantschas che sa participescha gia dapi intgins onns al champ da musica. Bildquelle: RTR.
-
Bild 2 von 7. Era la percussiun exercitescha mordio. Bildquelle: RTR.
-
Bild 3 von 7. Fadri Schocher da Malix suna gia dapi la segunda classa la battaria. Bildquelle: RTR.
-
Bild 4 von 7. A Miguel Demont da Mustér fai grond plaschair da pudair sa participar per la terza giada al champ da musica da la Brass Band da giuvenils dal Grischun. Bildquelle: RTR.
-
Bild 5 von 7. Cunquai ch'ils dis èn lungs dovri tranteren era spazi per risadas e discurs pli lucs. Bildquelle: RTR.
-
Bild 6 von 7. Ils eufoniums ed ils baritons èn semtgads per ils concerts da la fin d'emna. Bildquelle: RTR.
-
Bild 7 von 7. Pierin Simonet da Stierva (dretg) è cun ses 25 onns in dals vegls participants dal champ. El sa participescha dapi 10 onns. Bildquelle: RTR.
Premissa è che las giuvnas e giuvens sunan en ina societad da musica u en in ensemble cumparegliabel. Damai che la cifra da participantas e participants è sa reducida ils davos onns sunan tuts e tuttas en la medema band – uschia na vegnan els betg classifitgads tenor nivel. Quai fetschia in zic pli grev l’elecziun da tocs adattads, di il dirigent Gian Stecher. Ma l'impurtant saja ch'ils giuvenils sa participeschian ed era cun in dumber pli pitschen vegnian ins da far musica dad auta qualitad.