Artg musical - 50 onns NJBB

Gievgia, ils 19 d'avust 1976, è stà l'emprim concert da la Brass Band naziunala da giuvenils a Thun. Igl è stà la finiziun da l'emprim curs da stad (ils 13 fin ils 22 d'avust 1976) a Gwatt nua che 51 giuvnas e giuvens èn sa participads.

Ils dirigents èn stads André Winkler e Fritz Vögelin. E sco mainaregisters èsi gia lura grategià da pladir duas persunalitads da la scena da brass englaisa: Philipp McCann (cornet) e Ian Craddock (eufoni, bass e corns). La suprastanza da la NJBB eran Markus S. Bach (fundatur da la Brass Band Berner Oberland), Markus Zwahlen, Fritz Brand e Franziska Lechner. Organisà ils concerts aveva Ernst Obrecht.

Intginas furmaziuns dal passà

Dapi lura è il dumber da participantas e participants creschì stediamain e l'onn 1984 han ins fatg duas bands: la A-Band (furmaziun originala) e la B-Band. Radund 100 giuvenils tranter 12 e 23 onns or da l'entira Svizra tschertgan la sfida d'ina emna da scolaziun e perfecziunament durant in curs da stad. Durant l'emna vegnan ils giuvenils instruids d'instrumentalistas e d'instrumentalists en emprovas singulas, emprovas da register u era cun referats e curs da teoria.

Durant tut quels onns hai era adina dà participants dal Grischun e da la Svizra Rumantscha, sco per exempel: Roman Caduff, Rafael Camartin, Andreas Beer, Remo Solèr, Jan Luzi Baumgärtner u Simon Gabriel, per numnar be intgins.

Cronica

Era da chattar tranter ils participants dals ultims decennis èn persunas che han pli tard fatg il pass dal musicant al dirigent – sco per exempel Arsène Duc, Hervé Grélat, Pascal Eicher, Michael Bach, Philippe Bach, Véronique Pitteloud u Philippe Werlen. Ed era cumponists sco Ludovic Neurohr u Etienne Crausaz èn stads commembers da la NJBB.

Program da giubileum

Per festivar il giubileum da 50 onns ha la suprastanza, cun Monika Bandi a la testa, planisà diversas occurrenzas. Uschia hai dà ils 9 da fanadur concerts publics ad Interlaken (A-Band) e Grindelwald (B-Band), ed en l'ustaria sin il Männlichen hai dà in apéro per giasts envidads ed in concert da la A-Band.

La gievgia, ils 10 da fanadur, ha la A-Band dà in concert ad Oensingen (SO) e la B-Band ha concertà en il Giura, a Courtételle.

NJBB l'onn da giubileum

Il venderdi han omaduas bands dà in concert en la Concert Hall ad Andermatt (RTR ha registrà quel) e la sonda è la NJBB sa participada als «Bregenzer Festspiele» – Young People's Night. Sco punct culminant e finiziun dal curs da stad 2025 hai dà a Conthey (VS) in «inscunter da la famiglia NJBB» – il festival d'alumni (anteriuras participantas ed anteriurs participants dals curs da stad) ensemen cun la Brass Band Valaisia, la Brass Band Bürgermusik Luzern e la Brass Band 13 Étoiles. Tuttas trais bands èn stadas campiuns europeics.

Terms impurtants en l'istorgia

Aifer ils ultims tschintg decennis ha la NJBB pudì festivar intgins success, ma era realisar intgins concerts e viadis. Uschia per exempel il 1978 cura che la furmaziun ha pudì sa participar al Yehudi Menuhin Festival a Gstaad, il 1981 il viadi en la Scozia u ils onns 1985, 1992, 1999, 2004 e 2005 nua che la band ha prendì part mintgamai al Welt Jugendmusik Festival a Turitg.

Ovras sin incumbensa

In'impurtanta rolla gioga la NJBB era cun sunar novas cumposiziuns. Adina puspè surdat la suprastanza da la band a cumponists l'incumbensa da scriver novas ovras. Uschia per exempel «Rock Music» da Goff Richards, «Sinfonietta» da Jean Ballissat, «Masquerade für Brass Band» da James Curnow u er «Three Miniatures for Brass Band» da Philip Sparke. Per l'onn da giubileum ha il giuven Svizzer Gauthier Dupertuis scrit l'ovra «Terminal» per la B-Band e l'Austriac Thomas Doss ha cumponì «Brass Fire» per la A-Band.

Analog a la NJBB datti en il Grischun dapi il 1988 era il camp da stad da la Jugend Brass Band Graubünden.

Exempel era per il Grischun

Differentas persunalitads en il Grischun han fatg en il chantun Grischun lavur da piunier per la musica da Brass Band. Uschia per exempel Martin Casentieri ch'è stà fundatur da la BB Graubünden e cuniniziant da la JBBG, la Jugend Brass Band Graubünden. Ils emprims trais onns (1988, 1989 e 1990) ha Martin Casentieri era dirigì sez la furmaziun durant il curs da stad da la JBBG a Breil.

Ma era per musicantas e musicants d'instruments a flad da lain datti dapi decennis en il Grischun la pussaivladad da sa scolar durant la stad durant il camp dal JBOG, Jugend Blasorchester Graubünden.

Rapports en il radio davart la NJBB. Ord l'archiv:

Podcast Artg musical

L’Artg musical è in caleidoscop da tut quai che capita en la scena da musica en Svizra rumantscha, en il Grischun e sur ils cunfins da quel ora. Tadlai las pli novas registraziuns dad RTR, intervistas cun cumponists ed interprets e las istorgias da davant e davos ils palcs da concert.

Ulteriurs audios e podcasts