Rest Giusep Tuor è il vegl da quatter uffants dad Aluis e Filomena Tuor-Degonda. El è creschì si a Cumpadials en la vischnanca da Sumvitg. Ses bab era magister e s'engaschava dasper la scola er fitg per la vita culturala e sociala en la vischnanca. Rest Giusep Tuor sa regorda anc bain co che ses bab exercitava en il suler da la chasa cun ils uffants che chantavan da Bavania, il chant da retgs. Quai era per el la «musica en suler» nua che ses bab accumpagnava sin in vegl armonium. Era Rest ha gia baud cumenzà ad empruar ora ils suns e tuns da quai instrument, raquinta el en l'Artg musical.
Dal magister primar al magister da musica
Suenter che Rest Tuor ha terminà cun success il seminari da magisters a Cuira ha el dà dus onns scola primara a Mustér. Il giavisch da far musica sco professiun era dentant gia denturn durant il temp da seminari. Cunquai che la plazza a Mustér era limitada sin dus onns è el sa decidì dad ir questa via. El vuleva mantegnair la vastadad dal spectrum da musica ed è perquai sa decidì da studegiar musica da scola a Lucerna. Silsuenter ha el survegnì ina plazza sco magister a Vaduz nua ch'el instruescha anc oz.
Dirigent cun ardiment
Durant il seminari ha Rest dirigì il quartet dubel dal Chor romontsch e lura er dirigì dus onns il Chor romontsch dalla scola cantunala. Il medem temp era el er vice-dirigent dal Chor mischedau Sumvitg/Cumpadials. Ed il diriger ha Rest Tuor mantegnì. Ils onns 90 ha el surpiglià la direcziun dal Chor mischedau Sumvitg/Cumpadials, il Chor Surselva ed era il Chor mischedau Laax. E tuts trais chors dirigia el anc oz cun grond engaschi, cun fieu e flomma.
Rest Tuor en acziun
L'emissiun Noss chors dals 03-03-2026:
