«Krise als Chanson» tematisescha crisas, actualitads, conflicts e malgistadads. Pli u main decent, ma be main relevant. Cun las chanzuns da lur 6avel album da studio pledenteschan Lorenz Häberli e Luc Oggier tematicas ch’occupeschan actualmain bleras e blers.
Betg be ils cuntegns da las chanzuns èn variants. Il duo ha per «Krise als Chanson» era collavurà cun diversas artistas ed artists. Tranter auter cun la chantautura «To Athena» en la chanzun «Altpapier» ubain cun Badnaiy tar «Safe».
Schegea ch’els han lur ragischs en il rap – tge ch’ins auda era oz anc savens na laschan els betg gugent fixar en categorias. Sch'i saja rap ubain pop ubain rap-pop na saja betg impurtant. L’idea maini tar ina chanzun ed in stil, la chanzun decida quasi en tge vestgì ch’ella cumpara. En lur album nov fan els uss era in pass linguistic. Sco usità en bleras chanzuns en Mundart dentant datti uss era pliras en tudestg da scrittira (Wie es ist, Alles umsonst).
Davart Lo & Leduc
Lorenz Häberli e Luc Oggier alias Lo & Leduc èn s’inscuntrà per l’emprima giada 2005 en il mundart-ensemble Pacomé. Suenter che la gruppa haja il 2009 publitgà lur emprim album sajan anc tantas chanzuns restadas nunpublitgadas ch’ils dus rappers èn sa decidì da publitgar in agen album cul titel «Update 1.0» – da quai temp anc sco Lo & Luc.
Lur emprim grond success sco Lo & Leduc han els lura gì il 2014 cun l’album «Zucker fürs Volk». Cun hits sco «All die Büecher» ubain «Jung verdammt» ha l’album cuntanschì il segund plaz en la parada da hits Svizra ed è restà per bun in onn en las charts.
Trais cifras han 2018 catapultà il duo sisum la parada da hits Svizra e sin il tron dals acts svizzers: 079. Sis giadas platin (180’000 portatuns vendids) hai dà e 21 emnas sin plaz 1 da la parada da hits – record da gliez temp!
Els èn restads fidaivels a la musica ed han fin oz anc gudagnà divers premis. Lo e Leduc che han studegià istorgia e germanistica èn dentant era activs en la scena litterara, tranteren sco scolasts da musica ed han sco sincronisaturs era gia dà lur vusch a duas figuras en in film d’animaziun.
Il 2026 vegnan els a sa preschentar per la quarta giada a Degen durant l’Open Air Lumnezia.
