Il 1872 han set umens fundà la Societed da musica S-chanf. Simpatisants e donaturs han gidà els da cumprar lur instruments. Da quest temp regnava povradad ed ina gronda discrepanza sociala. Las famiglias eran grondas, uschia ch'igl è d'admirar quellas persunas che han gì il curaschi da fundar ina societad da musica. Grazia als musicants passiunads e disciplinads, als dirigents pazients e severs dentant er grazia al sustegn da la vischnanca e da persunas privatas exista la Societed da musica S-chanf er anc 150 onns suenter sia fundaziun.
En la lunga istorgia da l'uniun datti natiralmain blers terms impurtants. Tar quests tutgan er la participaziun a festas da musica. La Societed da musica S-chanf n'è però betg sa participada regularmain a talas festas, en spezial a festas chantunalas va ella per regla be sch'ella è en l'Engiadina. Uschia è la musica stada l'ultima giada ad ina festa chantunala da musica il 2007 a Scuol.
Era la festa da giubileum fan musicantas e musicants da S-chanf senza grond brimbori dentant cun bler temp da cumpagnia. Dapi 60 onns ha la musica da S-chanf in stretg contact cun la musica da Wynau. Cler ch'ella è envidada al giubileum. Il venderdi fa S-chanf in pitschen concert da bainvegni per ils da Wynau e la sonda passentan las duas uniuns bler temp communabel cun ina spassegiada ed ina grillada. La sonda saira datti lura il concert nua che las duas musicas sunan intgins tocs. Silsuenter datti ina festa cun musica da saut e la dumengia va l'inscunter e la festa da giubileum a fin cun in ensolver communabel da las duas societads da musica.
Intgins terms ord l'istorgia da l'uniun
1878: La musica sa participescha a l'emprim Di da musica en l'Engiadina a Zernez
1898: La vischnanca cumpra ina bandiera cun ils emblems da quatter uniuns che serva il medem mument sco bandiera da musicants, chantaduras e chantadurs, gimnasts e gimnastas sco er da tiradurs. La bandiera è anc adina en funcziun.
1926: La musica prenda per l'emprima giada part ad ina festa chantunala da musica (Puntraschigna).
1965: Cumprà l'emprima unifurma (1981 la segunda ed il 2002 la terza ed actuala)
2022: Festa da giubileum da 150 onns cun concerts e saut.
Fotografias
-
Bild 1 von 4. 1910: Davant il Scaletta. Bildquelle: MAD.
-
Bild 2 von 4. 1926: Return da la festa chantunala da musica a Puntraschigna. Bildquelle: MAD.
-
Bild 3 von 4. 1965: Cortegi per il Concours Hippique a Zuoz. Bildquelle: MAD.
-
Bild 4 von 4. 1997: La Societed da musica S-chanf. Bildquelle: MAD.