La musica Concordia Müstair exista dapi il 1897. Ella suna en ina furmaziun da sturs (brass band) ed ha actualmain 15 commembras e commembers tranter 18 e 62 onns. In da quels è Valentin Pitsch che suna dapi 50 onns en la musica dal vitg.
Festa en etappas
Ses giubileum festivescha la societad da musica en etappas. L'avrigl ha la Musica Concordia dà in concert en la baselgia da Müstair. (Ils emprims concerts a l'entschatta da l'onn han els stuì dir giu pervi da las restricziuns da corona). La gronda festa da giubileum datti la fin da fanadur, ils 30-07 cun in concert da la Swiss Army Brass Band ed ils 31-07 cun ina matinada (Frühschoppen) da la Musica Concordia. Durant il di concerteschan lura diversas musicas dal conturn e la saira vegn festivà l'emprim d'avust ensemen cun la vischnanca e cun ils pled usitads, fieu e fieu artifizial e sco conclusiun cun il concert dals «Diabolics».
L'onn da giubileum vegn lura terminà cun in concert d'advent il december.
-
Bild 1 von 3. La Musica Concordia Müstair. Bildquelle: MAD.
-
Bild 2 von 3. Dapi 1897 exista la musica Concordia Müstair. Bildquelle: MAD.
-
Bild 3 von 3. In giubileum da 125 onns è definitivamain in motiv da far festa. Bildquelle: MAD.
Desditga dal dirigent ha purtà in tagl frappant
Il 2018 è il dirigent Roberto Donchi sa retratg suenter 21 onns sco dirigent. Tenor Dumeng Fallet (president) han cun el er auters musicants chalà per motivs da vegliadetgna u mancanza da temp. Uschia è il dumber da musicantas e musicants sa reducì marcantamain. Igl è però reussì da chattar in nov dirigent, Tobias Mair da Tschar (Tirol dal sid). Cun el suna la musica actualmain sco Brass-ensemble. Dumeng Fallet spera dentant ch'il dumber da commembras e commembers giaja puspè ensi e ch'els possian bainbaud puspè sunar litteratura da Brass Band.
Regurdientschas a la Festa federala da musica a Lucerna
Il 2006 è la Musica Concordia Müstair sa participada a la festa federala. SRF ha accumpagnà la musica perquai ch'ella ha gì il pli lung viadi a Lucerna. En in'emissiun moderada da Nik Hartmann ha SRF adina puspè purtà staziuns da viadi, da la partenza fin a l'arrivada ed er lur producziuns avant la giuria. Quai pudais mirar las set parts: