L'emprim chor viril en il Surses è vegnì fundà d'ina dunna: Sabina de Latour u sco ella vegn era numnada «Bina Latour». La dunna oriunda da Breil (Surselva) ha gì in grond talent da musica, sunava clavazin ed orgla ed il 1849 ha ella fundà ensemen cun intgins umens il Chor viril baselgia Savognin. Da quest temp era quai insatge remartgabel per ina dunna.
Bainbaud ha ella ed il nov chor pudì festivar emprims success, tant en il chant sacral sco era profan. Bina Latour ha fatg impressiun. Il cumponist Otto Barblan ha rapportà pli tard d'in schabetg dal 1853. Ses bab era expert ad ina festa da chant ed ha ludà la dunna ch'haja dirigì excellentamain.
En regurdientscha a sia fundatura e ses merits per ils emprims success chanta il Chor viril baselgia Savognin anc oz la «Messa da la Bina». Atgnamain è quai la «Missa Tertia quatuor vocibus humanis comitante organo» da Johann Herman Bergerhoff. Bina Latour ha exercità ed elavurà la messa ils emprims onns dal chor. En regurdientscha ad ella ha quella survegnì il surnum «Messa da la Bina».
Purtret d'ina dunna remartgabla
Fin l'onn 1857 ha Bina Latour dirigì il chor. Lura ha ella maridà Arnold Escher von der Linth ed è sinaquai sa domiciliada a Turitg. Autras persunas han surpiglià il post da diriger il chor viril, per part cun lungas periodas. Tranter auter Stefan Wasescha, Georgius Schmid von Grüneck (pli tard uvestg da Cuira), Peder Spinatsch (1903 - 1948), Rudi Netzer (1957 - 2004), Gionign Arpagaus (co-dirigent 2004 - 2010) e Jürg Wasescha (co-dirigent 2004 - 2010). Dapi il 2010 dirigia Gianign Arpagaus il chor che dumbra actualmain radund 40 chantadurs.
Ord l'album da fotografias dal chor
-
Bild 1 von 7. La "Bina" – fundatura ed emprima dirigenta Sabina de Latour, fotografia dal 1859. Bildquelle: Chor viril baselgia Savognin.
-
Bild 2 von 7. 1884 – la pli veglia fotografia dal Chor viril baselgia Savognin. Bildquelle: Chor viril baselgia Savognin.
-
Bild 3 von 7. 1936 – il chor a Lantsch. Bildquelle: Chor viril baselgia Savognin.
-
Bild 4 von 7. 1942 – il chor a Balsthal. Bildquelle: Chor viril baselgia Savognin.
-
Bild 5 von 7. 1974 – il chor paradescha avant il vitg da Savognin. Bildquelle: Chor viril baselgia Savognin.
-
Bild 6 von 7. 1999 – davant enamez il dirigent da plirs decennis Rudi Netzer. Bildquelle: Chor viril baselgia Savognin.
-
Bild 7 von 7. 2023 – il chor actual (davant il pli dretg, en schanuglias, il dirigent actual Gianign Arpagaus). Bildquelle: Chor viril baselgia Savognin.
Festa giubilara en pliras etappas
Ses giubileum da 175 onns festivescha il chor gist cun plirs eveniments sur in onn. Dapi il zercladur 2023 èn dus locals dal Museum regiunal a Savognin reservads per in'exposiziun nua che l'istorgia d'in dals pli vegls chors virils dal Grischun vegn mussada. Tranter auter massa fotografias, rapports da festa, pliras unifurmas (tranter auter l'emprima dal 1979) e divers tschupels da festas da chant.
Il december ha il chor avert ses onn giubilar cun dus concerts d'advent e commemorativs. La fin favrer 2024 hai dà ina saira da film e divertiment sut il motto «Noss chor – nossa istorgia – nossa vischnanca». A quella han ins tranter auter mussà pliras sequenzas da films, raquintà l'istorgia da l'uniun, fatg l’onuraziun da veterans sco era preschentà in quiz e divertì la populaziun.
Il punct culminant da l'onn da giubileum è ils 5 da matg 2024. Lura chanta il Chor viril baselgia Savognin la messa festiva, la «Messa da la Bina» a chaschun da la festa per Nossadunna. RTR mussa la messa sco livestream sin rtr.ch. L'atun 2024 datti lura anc ina festa interna per tuts commembers e lur partenarias per concluder l'onn da giubileum.
Il chor a la Concurrenza svizra dals chors (favrer 2024, Cuira)
Il chor giubilar en emissiuns da RTR
Per il giubileum da 150 onns:
Per il giubileum da 125 onns:
Sin la plattafurma rtr.ch/festas chattais ulteriuras producziuns dal Chor viril baselgia Savognin a festas da chant.
