Suenter «L'onn da la clarinetta» (2015) e las «Quatter stagiuns dal sturs bass» (2019) ha l'Uniun da musica svizra declerà l'onn 2023 sco «L'onn da la litteratura svizra per musica instrumentala». L'onn tematic consista da plirs projects e concurrenzas. En il center stattan cumponistas e cumponists svizzers enconuschents e nunenconuschents.
Dals 8 fin ils 10 da settember 2023 ha lieu a Lucerna il festival «aVENTura» che rimna l'entira scena da musica instrumentala svizra en in lieu. Quest festival duai esser il punct culminant da l'onn e vul mussar la diversitad da la musica instrumentala svizra.
Program dal festival «aVENTura»
I dat divers concerts nua che ovras surlavuradas da cumponists enconuschents vegnan preschentadas. Ovras per orchester d'instruments a flad e brassbands da Jean Daetwyler, Jean Balissat, Stephan Jaeggi, Paul Huber, Albert Benz, Guido Fässler, Hans Moeckel u Albert Häberling e betg d'emblidar Frank Martin sco er Arthur Honegger. Sper ils concerts publics datti er ina vasta purschida per persunas dal fatg.
Tadlai l'intervesta per tudestg cun Andy Kollegger, il president da l'Uniun chantunala da musica dal Grischun e vicepresident da l'Uniun da musica svizra.
Sper il festival «aVENTura» datti er concurrenzas. Sut il motto «Societads da musica sunan cumponists svizzers» ha l'Uniun da musica Svizra creà in premi per il meglier program ch'è deditgà sulet a cumponists svizzers. Vinavant datti ina concurrenza da cumposiziun nua ch'ils participants han scrit in'ovra per brassband che sa basa sin in tema d'in cumponist svizzer gia mort.
Dapi il favrer 2023 è publitgada la pagina swisswindrep.ch che fa attent sin il repertori svizzer. Igl è ina datoteca che gida da metter ensemen programs per concert e che dat er infurmaziuns davart la litteratura per musica instrumentala svizra.
Dapli
Tadlai nossas pli novas registraziuns, intervistas cun cumponists ed istorgias da davant e davos ils palcs da concert.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.
