Sco mintga uman pon era societads ed uniuns festivar mintg'onn lur anniversari. Dals bun 100 chors grischuns han quest onn divers in anniversari radund. L'Artg musical porta chanzuns da quests chors giubilars:
- 30 onns Gesangsverein Sils im Domleschg
- 40 onns Chor Surselva e Chor mischedau Sevgein
- 100 onns Cor viril Samedan (fundà l'onn 1920, spustà la festa pervi da corona sin l'avrigl 2023)
- 120 onns Cor masdà Tschlin
- 125 onns Chor viril Falera
- 130 onns Chor cecilian Glion e schizunt
- 140 onns Männerchor Concordia Bonaduz
Ad els cordiala gratulaziun.
Tut ils chors han probabel en lur statuts l'intent da promover e tgirar il chant e da realisar concerts u sa participar a festas da chant. Quest scopo principal è la motivaziun per l'engaschi da chantaduras e chantadurs, dad ir durant in tschert temp regularmain ad emprovas ed exercizis da chant ubain er exercitar a chasa.
Mintgin dals chors giubilars (sco era tut ils auters chors) po probabel raquintar numerusas anecdotas u terms impurtants da si'istorgia. Els han segiramain passentà fasas cun dapli e cun damain chantaduras e chantadurs, occurrenzas plain success e muments pesants, trists e forsa era dumagnà ina u l'autra crisa. Quests muments n'han però betg laschar dar si ed i dat anc adina els, per fortuna.
Chant e musica fan bain a l'olma ed al corp. Far quai da cuminanza fa adina plaschair e bain savens pon ins er emblidar ils quitads e fastidis durant in'emprova dal chor. Or da quest motiv èsi da cuntinuar nunstanclentaivlamain e betg dar si da tschertgar e chattar novas chantaduras e novs chantadurs per uschia garantir in avegnir al chor.
Intgins chors giubilars en videos:
Tadlai nossas pli novas registraziuns, intervistas cun cumponists ed istorgias da davant e davos ils palcs da concert.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.
