En il final han ils trais giuvens talents Oriane Brückel (annada 2004, VS), Delia Steiner (2005, LU) e Linus Tschopp (2001, TG) cumbattì per il titel dal meglier solist u la meglra solista. Mintgin dad els ha sunà in solo, accumpagnà da l'Orchester d'instruments a flad sinfonic da la musica da l'armada svizra sut la direcziun da Gaudens Bieri.
La prestaziun da Delia Steiner ha persvadì il pli fitg la giuria (Irene Anda, Norvegia / Daniela Ivanova, Bulgaria/Svizra e Luca Medici / Svizra). La giuvna musicista dal chantun Lucerna, da Kastanienbaum, ha en spezial er impressiunà perquai ch'ella ha sunà tut senza notas.
Per Linus Tschopp n'hai danovamain betg tanschì per arrivar sisum il podest. Sco gia il 2021 è el vegnì segund.
Ina prestaziun impressiunanta ha er fatg la giuvna vallesana Oriane Brückel. Er ella è però victura en ils cors sco fitg buna tranter fitg buns.
En ina runda d'eliminaziun han els trais sco era ulteriur 15 talents giuvens gì la schanza da cuntanscher in dals trais plazs en il final, tranter quests era ina Grischuna, Annouk Bircher, trumbettista da Cuira.
Qualifitgads per la runda d'eliminaziun:
Florane Berthet (2006), oboa / Annouk Bircher (2002), trumbetta / Oriane Brückel (2004), cornet / Aurélie David (2003), flauta traversa / Lauriane David (2005), trumbetta / Edgar Fontaine (2006), posauna /Patrick Herta (2003), marimba / Andreas Kaiser (2002), cornet / Levinia Mesmer (2002), altsaxofon / Leonie Monnerat (2002), flauta traversa / Adrian Popp (2001), marimba / Joschka Rewicki (2005), tuba / Julian Rösch (1998), cornet / Delia Steiner (2005), flauta traversa / Linus Tschopp (2001), eufoni / Elia Voisard (2006), cornet / Joëlle Zemp (2000), cornet / Elias Zumbühl (2003), oboa
La giuria cun Philipp Wagner, Philippe Werlen, Mirko Huser, Thomas Trachsel e Christian Noth ha decidì tgenins trais talents che dastgan cumbatter en il final per il titel Prix Musique 2022.
Premi Stephan Jaeggi
En il rom dal final vegn quest onn surdà ad Arnold Spescha il Premi Stephan Jaeggi, la pli auta distincziun ch'i dat en la musica instrumentala svizra. Quest premi vegn surdà mintg'onn a persunalitads per lur engaschi en favur da la musica instrumentala. L'Artg musical da la dumengia ils 28 d'avust 2022 è deditgà ad Arnold Spescha.
