Ils 4 da settember 2012 è mort a Cuira Gion Antoni Derungs e gist per il festival en si'onur è cumparida la biografia dal cumponist lumnezian, scritta da Laura Decurtins.
Il pianist, organist e scolast da musica ha già baud gì simpatia per musica pli experimentala e nunusitada. Igl n'è perquai betg da smirvegliar ch'i dat anc adina ovras che n'èn anc mai vegnidas preschentadas publicamain. Quest onn, durant il Gion Antoni Derungs Festival a Cuira, hai gìst dà intginas primaudiziuns d'ovras dals onns settanta. Uschia ha per exempel l'Ensemble ö! sunà «Route» e «Sault dils morts», duas cumposiziuns per flauta, clarinetta, violina, cello, percussiun e clavazin. Il publicum ha pudì tadlar musica da Gion Antoni Derungs che tutga a la musica avantgardistica da lez temp e che lascha smirvegliar quant progressiv ch'el ha cumponì da lez temp.
Il festival ha organisà en tut set concerts da fitg different gener. Musica da chombra, chant sacral, concert d'orgla u er ovras per orchester ed ina matinada da chanzuns. L'Artg musical emprova da dar ina survista musicala dals divers concerts che RTR ha registrà dals 1. fin ils 4 da settember 2022.
RTR ha registrà tut ils concerts era cun maletg. Quels pudais vus guardar sin play rtr / musica.
Tadlai nossas pli novas registraziuns, intervistas cun cumponists ed istorgias da davant e davos ils palcs da concert.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.
