Siglir tar il cuntegn

Header

audio
150 onns Flurin Camathias
Or da Artg musical dals 02.10.2022.
laschar ir. Durada: 58 minutas 48 Secundas.
cuntegn

Artg musical Disc cumpact: 150 onns Flurin Camathias

«Fontaunas clar resunan, uals si cuolms naschi...» uschia cumenza ina da las fitg enconuschentas poesias da Flurin Camathias che Hans Erni ha mess en musica. E per il giubileum 150 onns Flurin Camathias ha la fundaziun Pro Laax era creà ina spassegiada a las set funtaunas en il vitg da Laax. Sin mintga pitga-funtauna datti ina tavla cun in code da QR che raquinta dapli or da la vita dal poet Flurin Camathias ch'è naschì ils 6 da mars 1871 a Laax.

purtret nair ed alv dal giuven poet Flurin Camathias
Legenda: Flurin Camathias, il poet e spiritual oriund da Laax. MAD

Suenter avair frequentà la scola populara a Laax ha el fatg il gimnasi a Mustér e Friburg. Suenter ha el terminà cun success il studi da teologia a Cuira ed ha pastorà a Breil (1896 – 1917), Andiast (1917 – 1934) ed a Siat (1934 – 1946). Sper sia lavur sco pastur da las olmas ha Flurin Camathias scrit bleras poesias (per part era translatà or d'autras linguas), ha scrit raquints (per exempel l'epos «Ils Retoromans» (1900), «La flur de Ramuosch» (1909)) ha rimnà ditgas (per exempel «Historias dil Munt sogn Gieri» (1916) ed è stà autur dal gieu festiv «La Ligia Grischa» (1924). El tutga tar ils impurtants poets e scribents rumantschs e fitg bleras da sias poesias èn mess en musica da divers cumponists rumantschs. El è mort ils 3 da favrer 1946 suenter curta malsogna en l'ospital a Glion. Sia fossa è a Laax.

«La sera sper il lag»

Gion Balzer Casanova che ha dà scola primara a Laax, ha tranter auter mess en musica sia poesia «La sera sper il lag» (emprima e terza strofa) ed uschia purtà quest text er or en l'Europa. La versiun originala da la poesia (cun trais strofas) è dal reminent scritta sin la fatschada da la chasa da scola a Laax. Cun questa chanzun ha Gion Balzer Casanova gudagnà il 2009 la concurrenza per La chanzun rumantscha.

La sera sper il lag (text original)

Avrir la box Serrar la box

Solemn ruaus cheu silla riva
d’umbriva stat il lag curclaus,
il bi sulegl cun sia glisch tardiva,
davos ils cuolms ei sesbassaus.

Utschals ruaussan e cupidan
bufatg gl'uaul trai flad
encunter tschiel las flurs salidan
cun plaids carins de pietad.

E giu da tschiel las steilas biaras,
migeivel miran giu el stgir,
miu cor tgei aunc empiaras,
va era ti tier dultsch durmir.

Per las festivitads da «150 onns Flurin Camathias» ha la fundaziun Pro Laax era edì in cudesch davart il poet da Laax, ha organisà in'exposiziun ambulanta ed organisà concerts. Plinavant datti er in album cun duas discs cumpactas plainas da chanzuns cun texts da Flurin Camathias. Cun Erwin Ardüser, commember da la fundaziun Pro Laax, hai discurrì davart las festivitads. Ses facit è ordvart positiv.

audio
Erwin Ardüser: «Flurin Camathias è puspè stà pli preschent»
ord Artg musical dals 22.09.2022.
laschar ir. Durada: 6 minutas 51 Secundas.

RTR Artg musical 15:00

Artitgels legids il pli savens

Scrollar a sanestra Scrollar a dretga