Il dischequiliber da buobas e buobs en ils chors d'uffants e giuvenils dal Grischun n'è betg insatge nov. Era sch'ils chors virils grischuns han ina gronda tradiziun datti fitg paucs buobs che chantan en chors d'uffants. I dat singuls che cumenzan cun quest hobi – suenter in temp prendan ils blers dentant puspe cumià da quest'activitad. Ina da las raschuns: la midada da la vusch.
Durant la pubertad daventa l'atgna vusch incontrollabla e quai fa vegnir malsegirs als mats.
In sguard en l'archiv...
In sguard en l'archiv RTR mussa che quest dischequiliber n'è betg ina novitad.
Era sch'intgins buobs bandunan quest hobi durant il rumper la vusch è la dirigenta engiadinaisa Nina Mayer persvasa ch'els scuvrian pli tard puspè il plaschair da chantar.
Cura ch'ils mats daventan umens survegnan els tuttenina puspè plaschair vi da lur vuschs sonoras e decidan lura forsa d'ir a chantar en in chor.
Chattar in recept per dar in cunterpais al dischequiliber da buobas e buobs en ils chors d'uffants n'è betg uschè simpel. Gruppas da buobs funcziuneschan en mintga cas auter che gruppas da buobas. Tenor la dirigenta Ladina Simonelli fissan gruppas be da buobs forsa pli adattadas per encuraschar era els da chantar.
Scha las buobas na fissan betg latiers vessan ils buobs forsa dapli curaschi da chantar.
Differents chors d'uffants e giuvenils grischuns
