«Igl ei puspei vargau in onn, in auter vul vegnir...» uschia hai num en la «Canzun d’onn vegl», ina melodia tradiziunala cun text da Stefan Gabriel. Gea, igl è puspè passà in onn e gia avain nus fatg bainvegni al 2023. RTR giavischa a las audituras ed als auditurs da l' Artg musical, in bun onn nov. Nus sperain che quel portia blers bels muments musicals.
En l'emissiun datti ils pli differents stils da musica – da musica populara, sur chant, schlagher, chantauturs fin musica d’orchester – e cun titels che han da far cun la midada da l'onn. Pia musica da Silvester a Bumaun. Hildegard Knef chanta per exempel «Prost Neujahr», Slavko Avsenik und seine Original Oberkrainer sunan «Rund um Neujahr herum» u il Jodelquartett Säntis «Altjohr/Neujohr». Ma era ils Furbaz giavischan «In bien niev onn» ed il Chor maschadò dad Andeer lascha resunar la «Canzun da Daniev». Pia in'ura cun musica divertenta per dar ina buna e legraivla partenza en l'onn nov.
Le Phénix suna Michel Corrette
En la segund'ura Artg musical datti musica classica. Cun la «Kantate zum Neujahr» da Christoph Graupner cuntinuescha «Ein Weihnachtsoratorium» che l'Artg musical dals 25-12-2022 ha purtà. L'entira ovra cumpiglia nov cantatas davent las quatter dumengias d'advent sur ils dis da festa da Nadal sur Bumaun fin a Buania (Trais sontgs retgs). La «Kantate zum Neujahr» è scritta per soli, chor ed orchester e cumpiglia set parts.
Dapli da Christoph Graupner
En quell'ura cun musica classica datti dentant er musica da Michel Corrette, in cumponist franzos che ha vivì dal 1707 fin il 1795. El era ina persunalitad marcanta en la cultura musicala da la Frantscha. Il 2021 ha l'orchester grischun Le Phénix vulì mussar respect a quest vegl «meister» ed ha registrà in disc cumpact cun ils «Concerti op. 26». L'ovra cumpiglia en tut sis concerts per cembalo u per orgla ed orchester. Ils solists èn Vital Julian Frey (cembalo) e Hannfried Lucke (orgla). La registraziun dal disc ha l'orchester fatg en la baselgia refurmada San Mauritius a Zernez. La raschun per quest lieu da registraziun è l'orgla da Lochner che sa chatta en questa baselgia. Quella è intunada sin 415 Hertz, in'intunaziun ideala per musica da baroc.
Dapli da Le Phénix
Tadlai nossas pli novas registraziuns, intervistas cun cumponists ed istorgias da davant e davos ils palcs da concert.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.
