Sonda ils 20 da settember 2025 è il KKL a Lucerna danovamain il center da la musica da brass. Nov formaziuns da la Svizra ed il giast internaziunal dals Stadis Unids, la Five Lake Silver Band, cumbattan per las arbajas. La band da Michigan è gia la 26avla furmaziun da l'ester che tschertga la sfida da sa concurrenzar cun l'elita svizra da brass bands. E betg mo las meglras brass bands da la Svizra s'inscuntran regularmain a Lucerna.
Gronda comunitad da fans
Mintg'onn sa rimna vers la fin da settember er ina gronda fulla da fans da la musica da brass en ed avant il KKL a Lucerna. Il Swiss Open enconuscha ina gronda comunitad da fans che vegnan mintg'onn a tadlar las producziuns. Cun intginas da questas persunas ha RTR pudì discurrer davart lur motivaziun e lur plaschair. Tranter questas persunas datti er Grischunas e Grischuns che fan il viadi dapi blers onns. RTR discurra cun els.
La concurrenza
Mintga band ha da sunar il toc da pensum pretensius dad Oliver Waespi: «Hypercube». L'ovra è segnada da ritmus cumplex, d'ina sonoritad profunda ed ina structura architectonica che pretenda bler da musicantas e musicants e che porscha al publicum in eveniment da tadlar.
Sper il toc da pensum preschenta mintga band er in toc da patg ord il repertori da cumposiziuns originalas per Brass Band sco per exempel «Blitz» (Derek Bourgeois), «Extreme Make-Over» (Johan de Meij), «Visions of Gerontius» (Kenneth Downie) u «Pageantry» (Herbert Howells).
Tgi gudogna?
Er quest onn n'è la 13 Étoiles betg da la partida cunquai ch'ella suna anc ina giada al British Open uschiglio fiss ella natiralmain in grond favurit. Dals ultims tschintg Swiss Open ha la Band dal Valais gudagnà trais giadas il titel. L'onn passà ha in'autra furmaziun dal Vallais gudagnà ed emprova natiralmain da defender il titel: Valaisia Brass Band cun Arsène Duc. Ed adina tranter ils favurits èn la BBO (Brass Band Berner Oberland) e la BML (Brass Band Bürgermusik Luzern). Er da la partida è la Liberty Brass Band da la Svizra orientala che ha quest onn fatg furora al prim Mountain Brass Contest a Domat. Forsa grategia ad els la surpraisa?
Decisiv per ina buna prestaziun è la furma dal di e natiralmain er la valitaziun da la giuria. Lezza sa cumpona quest onn da Carlo Balmelli (CH), Pascal Eicher (CH), Robert Childs (GB), Howard Lorriman (GB) e Holger Brunner (D).
