Artg musical - «Ina passiun romontscha»

Ils 14 da settember 1972 han Gion Antoni Derungs (musica) e Gieri Cadruvi (ha per part adattà il text) edì «Ina passiun romontscha», in'ovra per il temp da curaisma e passiun. L'entira ovra cumpiglia nov carnets e l'idea dals editurs era che mintga plaiv duai pudair represchentar la passiun tenor ses savair e pudair.

En il mussavia proponan Derungs/Cadruvi tschintg variantas per il diever individual: chant dal pievel ed orgla (1), chanzuns per chor e meditaziuns d'orgla (2), ina varianta cun motettas per chor pli simplas (3) e pli grevas (4) cun meditaziuns d'orgla e la varianta cun l'entira passiun ord il carnet nov (5).

Impressiuns

En quest carnet nov è la passiun cumponida tras e sto vegnir preschentada dad ina persuna che gioga l'evangelist, solists (sopran (dunna e fumitgasa), tenor (Giudas, Pieder, Pilatus, primsacerdot), bass-bariton (Jesus)), chor ed accumpagnament d'instruments.

11 onns suenter la primaudiziun da l'ovra a Genevra (1979 en ina versiun franzosa da Jean-Marie Curti) ha il Chor mischedau Surselva cun ses dirigent Claudio Simonet gughegià il 1990 da preschentar l'ovra sco primaudiziun en la versiun originala. En il cudesch da program da lura statti: «La passiun da G. A. Derungs nascha directamain ord la Consolaziun ed è uschia garant ch'ina represchentaziun da quest sentiment musical è arcunada en nossas avainas».

«Ina Passiun romontscha»

Il publicum ha apprezià la preschentaziun ed ha applaudì freneticamain a la primaudiziun en la baselgia da Mustér (17-03-1990, baselgia s. Gions). Deplorablamain n'existan naginas registraziuns da quests concerts. Sco ina sort culissa aveva Gion Casanova (sculptur e chantadur en il chor mischedau Surselva) creà per mintga scena ina sculptura da laina.

Il 2025, 35 onns suenter la primaudiziun, han il Chor viril Lumnezia e ses dirigent decidì da puspè ina giada represchentar l'ovra (tenor il carnet 9 e cun las chanzuns dal carnet 6). Il dirigent Retus Giger ha instradà il project, er per l'anniversari da 90 onns ch'il cumponist Gion Antoni Derungs avess pudì festivar quest onn.

Per la represchentaziun da l'ovra ha Retus Giger vulì tant sco pussaivel interpretas ed interprets dal conturn, grischuns e rumantschs. Sper ils instrumentalists e solists da professiun èn quai era laics sco per exempel Silvio Collenberg da Cumbel. Dapli blers onns chanta el tenor en il Chor viril Lumnezia ed ha er chantà en il Cantus Firmus Surselva u en l'ensemble DeCanto. En la passiun gioga el differentas rollas (Giudas, Pieder, Pilatus, primsacerdot).

Il solist Silvio Collenberg

I dat paucas passiuns rumantschas – quella da Gion Antoni Derungs È en mintga cass pretensiusa – era per solists. Sper ils solists e solistas da professiun, ha er in laic gughegià da surpigliar ina rolla. Silvio Collenberg da Cumbel – sez chantadur dal Chor viril Lumnezia ha tschiffà quella sfida. El ha exercità seperat cun il dirigent Retus Giger e trenà davos escha serrada a chasa.

Ieroglifas per l’organist

Il Chor viril Lumnezia ha preschentà per l'emprima giada «Ina passiun romontscha» da Gion Antoni Derungs. L'organist Marcel Heini da Horw ha giugà ina rolla centrala durant la producziun. Heini ha accentuà l'impurtanza da l'orgla per mantegnair l'armonia tranter ils chantadurs. Retus Giger, il dirigent dal chor, ha menziunà las sfidas da decifrar la partitura. La cumposiziun è stada ina sfida creativa per ils musicists involvì. Heini ha empruvà da transponer ils segns musicals – las hieroglifas ha el chapi.

In'ovra pretensiusa per il chor

Ils interprets e las interpretas:

• Chor viril Lumnezia
• Chor mischedau ad hoc
• Roman Weishaupt, evangelist
• Maria Catrina Caduff, sopran
• Silvio Collenberg, tenor
• Flurin Caduff, bass-bariton
• Christian Barenius, violina
• Selina Weber-Derungs, flauta
• Josias Just, clarinetta
• Clara Hagmann, violoncello
• Martin Heini, orgla
• Marin Muoth, percussiun
• direcziun: Retus Giger

Podcast Artg musical

Tadlai nossas pli novas registraziuns, intervistas cun cumponists ed istorgias da davant e davos ils palcs da concert.

Ulteriurs audios e podcasts